Այսօր Trend գործակալության կայքում տարօրինակ կերպով հայտնվեց արդեն մեկ շաբաթվա հնություն ունեցող մի տեսանյութ, որում Եվրահանձնաժողովի նախագահ Ժոզե Մանուել Բառոզուն Ադրբեջան կատարած այցի ժամանակ Բաքվի համալսարանի ուսանողների հետ հանդիպման ընթացքում հայտարարում է, թե ԵՄ-ն պաշտպանում է Ադրբեջանի տարածքային ամբողջականությունը, սակայն միաժամանակ նշում է, որ ԵՄ-ն սատարում է նաև Մինսկի խմբի գործընթացին (որտեղ, ի դեպ, այլ սկզբունքներ էլ են քննարկվում):
Իսկ ամբողջ խնդիրն այն է, որ Եվրահանձնաժողովի պաշտոնական կայքից բոլոր այն արտահայտությունները, որոնք վերաբերում էին Ադրբեջանի տարածքային ամբողջականությանը, հանվել են:
Ելնելով սրանից՝ քիչ առաջ Ադրբեջանի արտաքին գործերի նախարարությունը հանդես է եկել հայտարարությամբ, որտեղ իր բողոքն է արտահայտում վերոնշյալ փաստի կապակցությամբ:
Արտգործնախարարության հայտարարության մեջ ասվում է, որ այդօրինակ գործողությունները ափսոսանք և զարմանք են առաջացնում և կարող են լուրջ կասկածի տակ դնել ԵՄ-ի հետ հարաբերությունները, փոխվստահությունը և համագործակցության հարցերը: Այն փոփոխությունները, որոնք մտցվել են Բառոզուի կողմից Եվրահանձնաժողովի կայքում, ըստ Ադրբեջանի նախարարության հայտարարության, կարող են բացասաբար ազդել նաև Եվրամիության վարկի վրա:
«Առաջին լրատվականը» տեղեկացրել էր, որ անցած շաբաթ Բառոզուին հաջողվել էր լուրջ հաջողությունների հասնել Ադրբեջանի հետ գազի շուրջ բանակցություններում, սակայն մի շաբաթ չանցած Ադրբեջանն այդ համաձայնությունները, փաստորեն, դնում է կասկածի տակ:
Հիմա մնում է սպասել, թե ի՞նչ փոփոխություններ կանի կայքում Բառոզուն, և կանի՞ դա, թե՞ ոչ: