Եթե ոստիկանությանը հայտնի չեն, ապա ՀՀԿ-ին երկրից մշտապես բացակայողների ցուցակները հայտնի են. այսօր «Առաջին լրատվական»-ի հետ զրույցում նման տեսակետ հայտնեց ՍԴՀԿ անդամ Գուրգեն Եղիազարյանը` անդրադառնալով ՀԱԿ-ի և ՀՅԴ-ի՝ ոստիկանությանն ուղղված պահանջի պատասխանին, ըստ որի՝ պետական սահմանը հատող անձանց տվյալները ռեգիստրում չեն կուտակվում, և սահմանային մարմինը այդ անձանց տվյալները ոստիկանությանը տրամադրելու իրավունք և պարտականություն չունի:
Գուրգեն Եղիազարյանը նշեց, որ չգիտի, թե այդ գործառույթներն ինչպես են կանոնակարգված, դա ոստիկանության գործառույթ է, թե ոչ: «Ինձ մի բան է հայտնի, որ նախորդ ընտրություններում այդ ցուցակներից օգտվել են իշխանությունները, եթե ոստիկանությանը հայտնի չէ, ապա դրանք ՀՀԿ-ին հայտնի ցուցակներ են: Այսքան ժամանակ այդ հաղթանակները, երբ ժողովուրդն ընտրում է մեկին, ՀՀԿ-ն նորից վերարտադրվում է իր թեկնածուի միջոցով, շան գլուխը թաղված է այդ ցուցակների մեջ»,- նկատեց ՍԴՀԿ անդամը:
Անդրադառնալով չորս կուսակցությունների միջև կնքված՝ միասնական շտաբի ստեղծման համաձայնությանը` նա ասաց, թե գիտի, որ ՀԱԿ-ը միայնակ այս ամենի դեմ չէր կարող պայքարել, թեև 4 տարի պայքարել էր: «Ընտրություններում հաջողության հասնելու համար անհրաժեշտ է օժանդակություն, այս դեպքում չէր խանգարի, որ այդ օժանդակությունը լիներ: Որպես Գուրգեն Եղիազարյան՝ փորձում եմ հավատալ այս ամենին»,- մեկնաբանեց իր տեսակետը Գուրգեն Եղիազարյանը: