«Ես այս միջադեպի հետ կապված ավելի շատ քաղաքական միտում եմ տեսնում, քանի որ միջադեպը եղել է մեծամասնականով առաջադրված թեկնածուի հետ: Գնացել են նրա տուն, ասել, թե պիտի հրաժարական տաք: Դեպքն իմ հետ կապված չէ, թեկնածուն ԲՀԿ-ից չէ, և այդ միջադեպը ինձ հետ կապված նախկին դեպքի հետ չի կարելի կապել»,- «Առաջին լրատվական»-ի հետ զրույցում, անդրադառնալով այսօր առավոտյան Արմավիրի մարզում տեղի ունեցած միջադեպին, ասաց թիվ 21 ընտրատարածքի պատգամավոր Ռուստամ Գասպարյանը, որը ԲՀԿ համամասնական ցուցակի 22-րդ հորիզոնականում է:
«Շատ տհաճ բան է կատարվել, ամբողջ Արմավիրում հիմա լարված իրավիճակ է, աժիոտաժ: Անթույլատրելի է` թեկնածուին ծեծելով, առևանգելով տանեն`ինչ է մարզպետն ա ասում պիտի հրաժարական տաս և այլն… և՛ ղեկավարության հեղինակությանն են կպնում, և՛ անձամբ նախագահն ասել է` զոռբայությամբ հարց չի լուծվում: Երևի նախագահը տեղյակ չի, որ ներքևում զոռբաները նման ձևով են աշխատում»,- շարունակեց Ռուստամ Գասպարյանը:
Հիշեցնենք, որ թիվ 21 ընտրատարածքում առաջադրվելու մտադրություն էին հայտնել նաև Ռուստամ Գասպարյանը և ՀՀԿ-ական պատգամավոր Նահապետ Գևորգյանը` Նովոն: Ռ. Գասպարյանը բազմիցս հայտարարել էր` եթե Նահապետ Գևորգյանը չի առաջադրվի մեծամասնականով, ինքն էլ իր թեկնածությունը չի դնի: ՀՀԿ-ն որոշեց այդ ընտրատարածքում առաջադրել ՀՀԿ-ական Ալեքսան Պետրոսյանին` ՄԱՊ-ի Ալիկին:
Այսօրվա ծեծկռտուքի գլխավոր հերոսներից մեկը Ռուստամ Գասպարյանի վրա մահափորձ կատարած, 8.5 տարի ազատազրկման դատապարտված և ընդամենը շաբաթներ առաջ պայմանական վաղաժամկետ ազատ արձակված Սամսոն Պողոսյանն է եղել, իսկ մյուսը՝ ԱԺ ՀՀԿ-ական պատգամավոր Նահապետ Գևորգյանի որդին: Նրանք տնից դուրս էին հրավիրել թիվ 21 ընտրատարածքի մեծամասնական ընտրակարգով առաջադրված ԱԺ թեկնածու Մերուժան Մխոյանին և վեճի բռնվել: Ավելի վաղ լրատվամիջոցները տեղեկացրել էին, թե ծեծկռտուքից հետո Մերուժան Մխոյանն ինքն է գնացել Նահապետ Գևորգյանի հարազատ գյուղ՝ Սարդարապատ, և շարունակել վեճը: Սակայն ինչպես «Առաջին լրատվական»-ին հավաստիացրեց Մերուժան Մխեյանի ընկերը` Արթուրը, ոչ թե նա է գնացել Սարդարապատ, այլ իր ընկերոջը ստիպողաբար են տարել Սարդարապատ:
Նշենք, որ դեռ ամիսներ առաջ մամուլում լուրեր էին շրջանառվում, որ ԱԺ պատգամավոր Նահապետ Գևորգյանը աշխատանքներ է տանում Սևան ՔԿՀ-ում պատիժը կրող Սամսոն Պողոսյանին պայմանական վաղաժամկետ ազատելու համար` նպատակ ունենալով նրան օգտագործել նախընտրական շրջանում հարցեր լուծելու համար:
«Փաստը չի՞ երևում, որ Սամսոն Պողոսյանը օգտագործվում է: Ես չեմ ազատելու որոշում կայացնողը, ազատ արձակողը, արդեն երկրի ղեկավարները թող մտածեն՝ խի՞ են նման մարդկանց վաղաժամ ազատ արձակում, որ հետո էլ նման միջադեպեր լինեն»,- հավելեց նա: Հարցին, թե այդ ընտրատարածքում ինքն ո՞ւմ է սատարելու, պատգամավորը պատասխանեց. «Ոչ մեկին, ես համամասնական ցուցակով եմ և աշխատում եմ իմ կուսակցության ձայների համար»: Կոալիցիոն գործընկերոջ առաջադրած ՀՀԿ թեկնածուի՞ն էլ չեք համակրում. «Դա իրենց խնդիրն է, ես ՀՀԿ հետ ի՞նչ կապ ունեմ»:
Հայաստանի ոստիկանության Արմավիրի քննչական բաժնում այս միջադեպի առնչությամբ հարուցվել է քրեական գործ` դիտավորությամբ առողջությանը ծանր վնաս պատճառելու դեպքի առթիվ: Գործը նախաքննության փուլում է: Քրեական գործը հարուցվել է Քրեական օրենսգրքի 112-րդ հոդվածի 1-ին մասով: Ձերբակալվածներ չկան:
