Հանրապետական կուսակցության պատգամավոր Արտակ Զաքարյանը ՀԱԿ-ի, ՀՅԴ-ի, ԲՀԿ-ի և «Ժառանգության» կողմից երեկ ստորագրված՝ ընտրությունների վերահսկման միասնական շտաբ ստեղծելու վերաբերյալ հայտարարությունը «ձևական» է որակում։ Պատգամավորի խոսքով՝ առանց դրա էլ ցանկության դեպքում հնարավոր է արդար ու թափանցիկ ընտրություններ անցկացնել: Այս մասին նա ասաց «Առաջին լրատվական»-ի հետ զրույցում:
«Նմանօրինակ հայտարարությամբ այդ կուսակցությունները ցանկանում են հասարակությանն ի ցույց դնել, որ հավաքվել են, փորձում են ինչ-որ բան անել: Բայց հավաքվելն ու հայտարարություն ստորագրելը դեռևս չի նշանակում, որ այդ ամենը ժողովրդավարական ընտրությունների անցկացման երաշխիք է: Մի կողմից՝ հավաքվել, հայտարարություն ստորագրել, մյուս կողմից՝ հասարակության հետ խոսել ընտրակաշառքների լեզվով, անհասկանալի է: Ինձ համար շատ կարևոր է, որ բոլոր քաղաքական ուժերն իրենց մեջ ուժ գտնեն և կարողանան իրենց հայտարարությունները կյանքի կոչելու հնարավորություններ ունենալ»,- ասաց Արտակ Զաքարյանը:
Պատգամավորի խոսքով՝ ՀՀԿ-ն առաջինն էր, որ կարևորեց ընտրությունների կազմակերպման որակը: «Մենք մեր համոզմունքներին հավատարիմ լինելով՝ անելու ենք ամեն ինչ, որպեսզի Հայաստանում տեղի ունենալիք ընտրությունները բարելավեն մեր երկրի ժողովրդավարական ցուցանիշները»,- նշեց քաղաքական գործիչը:
Հիշեցնենք, որ խորհրդարանական ընտրություններին մասնակից 4 քաղաքական ուժեր՝ Հայ ազգային կոնգրեսը, Դաշնակցությունը, «Ժառանգություն»–ը և «Բարգավաճ Հայաստան»–ը, երեկ ստորագրել են ընտրությունների վերահսկման միասնական շտաբ ստեղծելու մասին հայտարարություն, որին չի միացել միայն համատեղ քննարկմանը մասնակցած ՀՀԿ-ն: