Ուկրաինայի և Եվրամիության միջև Ասոցացման համաձայնագիրը չի ստորագրվի, քանի դեռ քաղբանտարկյալներ Յուլյա Տիմոշենկոն և Յուրի Լուցենկոն ազատ չեն արձակվել: Այս մասին հայտարարել է Մեծ Բրիտանաիայի՝ ԵՄ-ի հարցերով նախարար Դևիդ Լինդինգթոնը:
«Ասոցացման մասին համաձայնագիրը հազիվ թե ստորագրվի և վավերացվի, եթե ընդդիմության առաջնորդները, որոնք ճաղերի հետևում են հայտնվել անկատար դատական գործընթացների պատճառով, չազատվեն և չկարողանան մասնակցել քաղաքական կյանքին»,- ասվում է ուկրաինական «Օրը» թերթում հրապարակված Լիբթինգթոնի հոդվածում:
Եվրոպայի հարցերով Մեծ Բրիտանիայի նախարարը նշում է, որ խոսքը ոչ թե առանձին անհատների ճակատագրի, այլ արդարադատության համակարգային խնդիրների և դատավորների անկախության մասին է: Նա նշել է, որ դա կասկածի տակ է դնում Ուկրաինայի կառավարության հավատարմությունը եվրոպական արժեքներին և նորմերին, որոնք կազմում են Ասոցացման համաձայնագրի հիմքը:
Լինդինգթոնի խոսքերով՝ այդ ֆոնի վրա մեծ նշանակություն են ստանում 2012 թ. հոկտեմբերին երկրում սպասվող խորհրդարանական ընտրությունները, որոնք կարող են փորձություն դառնալ՝ Ուկրաինայի ժողովրդավարության աստիճանը ստուգելու համար:
«Մենք հույս ունենք, որ Ուկրաինայի կառավարություններն այսօր և ապագայում խիզախություն կունենան այնպիսի քաղաքական որոշումներ ընդունել, որոնք հնարավորություն կտան, որպեսզի ասոցացման մասին պայմանագիրն ուժի մեջ մտնի»,- ասել է բրիտանացի պաշտոնյան:
