Ռուսաստանի տարածքով Աֆղանստան (և հակառակը) տեղափոխվող ՆԱՏՕ-ի տարանցիկ բեռները կարող են հավելյալ զննում անցնել դրանցում թմրանյութերի առկայությունը ստուգելու համար: Այս մասին RIA Novosti-ին տված հարցազրույցում հայտնել է ՌԴ փոխարտգործնախարար Ալեքսանդր Գրուշկոն:
«Ռուսական կողմը հատուկ ուշադրություն է դարձնում անվտանգության միջոցառումներին, ուստի ՆԱՏՕ-ի հետ սկզբունքային պայմանավորվածություն կա, որ մեր երկրի տարածքով անցնող բոլոր տարանցիկ բեռները հավելյալ ստուգման պետք է ենթարկվեն՝ թմրանյութերի առկայությունը պարզելու համար»,- ասել է նա:
ԱՄՆ-ը հույս ունի հաջողությամբ լուծելու Ուլյանովսկում ՆԱՏՕ-ի վերաբեռնավորման կետ ստեղծելու հարցը: Ավելի վաղ ԶԼՄ-ները հաղորդում էին, որ Ռուսաստանը հնարավոր է՝ ՆԱՏՕ-ի հետ պայմանագիր ստորագրի Ուլյանովսկում նրան բեռների փոխադրման համար տարածք տրամադրելու մասին:
