Չեմպիոնների Լիգայի գավաթի ընթացիկ խաղարկության քառորդ եզրափակիչ փուլի շրջանակներում «Բարսելոնա»-«Միլան» պատասխան հանդիպումից հետո «ռոսոներիներ»-ի պաշտպան Ալեսսանդրո Նեստան չի ցանկացել իրենց ակումբի պարտությունը կապել հանդիպման մրցավարի սխալ որոշումների հետ:
«Անկասկած, «Բարսելոնա»-ն շատ ուժեղ է, սակայն մենք ևս վտանգավոր պահեր ստեղծեցինք: Մրցավարը փոքր-ինչ օգնեց նրանց, սակայն մյուս դրվագներում կատալոնացիները ցուցադրեցին իրենց ներուժը: Ցանկացած ակումբ, որտեղ հանդես կգա Մեսսին, կունենա հիանալի շանսեր հաղթանակի հասնելու համար: Բոլորն ասում են, որ նա լավագույնն է, իսկ ես կարծում եմ, որ Մեսսին այժմյան «Բարսելոնա»-ի 60-70 տոկոսն է», – ասել է Նեստան:
Հիշեցնենք, որ Չեմպիոնների Լիգայի գավաթի ընթացիկ խաղարկության քառորդ եզրափակիչ փուլի շրջանակներում «Բարսելոնա»-«Միլան» պատասխան հանդիպումը ավարտվեց «կապտանռնագույներ»-ի հաղթանակով` 3:1 հաշվով:
