Facebook սոցիալական ցանցը հակընդեմ հայց է ներկայացրել Yahoo-ի դեմ` այդ կերպ պատասխանելով Yahoo-ի կողմից ավելի վաղ հնչեցված մեղադրանքներին, որոնք վերաբերում են սոցիալական ցանցի կողմից արտոնագրերի խախտման հավակնություններին: Այս մասին տեղեկացնում է businessweek.com-ը` հղում անելով Associated Press-ին:
Facebook-ը մեղադրում է Yahoo!-ին` իրեն պատկանող մի շարք արտոնագրերի խախտման համար: «Խախտողները» եղել են Yahoo!-ի գլխավոր էջն ու դրանում տեղադրված գովազդը: Այնտեղ կիրառվել է C.O.R.E. տեխնոլոգիան, որը հավաքում է նորությունները` ըստ օգտատիրոջ հետաքրքրությունների և Flickr ֆոտոհոսթինգը:
«Արտոնագրային պատերազմը» երկու ինտերնետ հսկաների միջև սկսվել է այս տարվա փետրվարի վերջին, երբ Yahoo!-ն Facebook-ին մեղադրեց իր տասնյակ արտոնագրերի խախտման համար: Երկու շաբաթ անց գործը դատարան մտավ: Արտոնագրերը վերաբերում էին այն տեխնոլոգիաներին, որոնք պատասխանատու են համացանցային գովազդների, տեքստային հաղորդագրությունների փոխանցման, սոցիալական ցանցերում մեկնաբանությունների զետեղման համար:
Facebook-ը հերքում է մեղադրանքները: Դիմահար հայցը սոցիալական ցանցին թույլ կտա խուսափել լիցենզիոն վիթխարի վճարներից, որին փորձում է հասնել Yahoo-ն:
Իր հայցում Facebook-ը պահանջում է դատարանից` մրցակցի հավակնություններին տեղի չտալ և արգելել նրան ապագայում նման հայցերով դիմել իրեն:
Մրցակցի «հարձակումներից» պաշտպանվելու համար սոցիալական ցանցը մարտի 22-ին IBM ընկերությունից 750 արտոնագիր է ձեռք բերել:
