Հայտնի են ԱԺ ընտրություններին մասնակցող կուսակցություններից չորսի կարգախոսները: Հանրապետական կուսակցությունը հասարակությանն առաջարկում է. «Հավատանք, որ փոխենք», ԲՀԿ-ն` «Հավատա, վստահիր, պահանջիր», ՕԵԿ-ը` «Հավատանք, որ կառուցենք օրինաց երկիր» և ՀՅԴ-ն` «Ազատություն, արդարություն, դաշնակցություն» կարգախոսը: Իշխանական կուսակցությունների կարգախոսները հասարակությանը դեզօրիենտացիայի ենթարկելու թույլ փորձեր են: Այս մասին «Առաջին լրատվական»-ի հետ զրույցում նշեց ՌԱՀՀԿ փորձագետ Էդգար Վարդանյանը:
Նա ասաց, թե այն, որ իշխանական կուսակցությունները «հավատալ» բառն են ներառել իրենց նախընտրական կարգախոսների մեջ, նշանակում է, որ նրանք ևս հասկանում են, որ հասարակությունում կա խորը անվստահություն իշխանությունների նկատմամբ, և եթե այդ խորը անվստահությունը պահպանվի, ապա իշխանությունները կշարունակեն մնալ ոչ լեգիտիմ լայն զանգվածների աչքերում: Ըստ Է. Վարդանյանի` նրանք, բնականաբար, փորձում են խաղարկել այն հանգամանքը, որ իրենք այլ են լինելու, այսինքն` որ իրենք հասկանում են, որ կան խնդիրներ, փորձում են հասկացնել հասարակությանը, ներմուծել այն գաղափարը, որ հասկանում են, թե կան խնդիրներ և պատրաստ են վերափոխվել: «ՀՀԿ կարգախոսում կար նաև «փոխվել» բառը: Սա ընդամենը խաղարկում է, և ես կարծում եմ, որ ավելի գիտակից զանգվածի մոտ որոշակի քմծիծաղ է առաջացնում, որովհետև հասկանում են, որ հասարակությանը դեզօրիենտացիայի ենթարկելու շատ թույլ փորձեր են»,- մեկնաբանեց Է. Վարդանյանը:
Ըստ նրա` կարգախոսները նաև ունեն արտաքին հասցեատեր: «Մենք բոլորս գիտենք, որ Արևմուտքը հստակ պահանջներ ունի իշխանությունների առջև, որ նրանք պետք է ցույց տան, որ իսկապես կարող են արդար ընտրություն կազմակերպել և ընդհանուր առմամբ ռեֆորմիստ են, փոփոխությունների գնացող են և պետք է դա ապացուցեն, միայն այդ դեպքում ֆինանսական աջակցություն կստանան: Կարգախոսը մեսիջ է, որ տեսեք` մենք հասկացել ենք Ձեր մեսիջը և Ձեզ մեսիջով ենք պատասխանում, որ իսկապես այդ ուղով ենք գնում»,- մանրամասնեց իր տեսակետը փորձագետը` հավելելով, որ չի կարծում, որ մեսիջների փոխանակությունը կարող է լուրջ բան նշանակել:
