Mullock’s աճուրդի տունը վաճառքի է հանել Մահաթմա Գանդիի կյանքին ու գործունեությանը վերաբերող արժեքավոր իրերի հավաքածու: Ինչպես տեղեկացնում է Daily Mail-ը, աճուրդի հանված իրերի շարքում Գանդիի կլոր շրջանակներով ակնոցն է, որը նա գնել էր 1890 թվականին` Լոնդոնում սովորելու ժամանակ: Վաճառքի ենթակա հավաքածուում ընդգրկված է նաև Գանդիի աղոթքների գիրքը, որը գրված է նրա հարազատ լեզվով` գուջարաթիով:
Հավաքածուում ընդգրկված են խոհափիլիսոփայական բովանդակությամբ նամակներ և չարկխան` անկախության համար պայքարի խորհրդանիշը դարձած հնդկական ավանդական ճախարակը:
Թանկարժեք լոտերից է հողով լցված բեռնարկղը: Արկղում գտնվող հողի վրա 1948 թվականի հունվարի 30-ին` մահվանից առաջ ընկել էր Գանդին: Այդ օրը աղոթքի ժամանակ հիդուս երկրպագուն կրակել էր Մահաթմա Գանդիի վրա: Նրա ընկած վայրում հողը հավաքվել է և որպես մասունք պահպանվել:
Սպասվում է, որ ապրիլի 17-ին կայանալիք աճուրդից մինչև 80 հազար դոլար կհավաքվի:
Հնդկաստանը բացասաբար է վերաբերվում արտերկրում Գանդիի ժառանգության վաճառքի փորձերին: 2009 թվականին Նյու Յորքում Գանդիի իրերի հերթական հավաքածուի աճուրդի ժամանակ Հնդկաստանի կառավարությունում հատուկ հանձնաժողով կազմվեց, որի ջանքերն ուղղվեցին մասունքները հայրենիք վերադարձնելուն: Արդյունքում հավաքածուն գնեց հնդիկ միլիարդատեր Վիջայ Մալլյան: Եվ, չնայած հավաքածուի մեկնարկային գինը 20-30 հազար դոլար էր, նա 1.8 միլիոն վճարեց:
