2009 թ. մահացած ԱՄՆ սենատոր Էդվարդ Քենեդիի օֆիս մենեջերը դատապարտվել է 20 ամիս ազատազրկման խարդախության համար: Այս մասին ասվում է ԱՄՆ արդարադատության նախարարության կայքում:
Ազատազրկման ժամկետի ավարտից հետո Նգոզի Փոուլը պետք է 500 ժամ անցկացնի հասարակական աշխատանքներում: Նրան նաև պարտավորեցրել են վճարել 77,608 դոլար՝ որպես վնասի փոխհատուցում:
Փոուլը մեղավոր էր ճանաչվել 2011 թ. փետրվարի 1-ին: Դատարանը պարզել էր, որ 2003-2007 թթ. ընթացքում նա Սենատի հաշվապահությանը սխալ տեղեկություն էր ներկայացրել իր աշխատանքի մասին և, որպես բոնուս, անօրինական կերպով ստացել էր ավելի քան 75 հազար դոլար: Ընդ որում, այդ ամենը նա հաջողությամբ թաքցրել է իր անմիջական ղեկավարից:
Associated Press-ը հայտնում է, որ Փոուլի պարտականությունների մեջ էր մտնում աշխատակիցների աշխատավարձերի և բոնուսների վերաբերյալ Սենատին տվյալներ ներկայացնելը:
Էդվարդ Քենեդին՝ ԱՄՆ նախկին նախագահ Ջոն Քենեդիի եղբայրը, Սենատում է եղել 1962 թվից մինչև իր մահը՝ 2009 թ.: