Ռուսաստանի Պետդումայի՝ միջազգային հարցերով կոմիտեի ղեկավար Ալեքսեյ Պուշկովը կարծում է, որ ռուս ձեռնարկատեր Վիկտոր Բուտի համար ցմահ ազատազրկում պահանջող ամերիկյան ֆեմիդան դրանով իսկ նախադեպ է ստեղծում: Այս մասին նա գրել է Twitter-ի իր միկրոբլոգում:
«Բուտին ցմահ նստեցնում են: Ընդ որում, մեր քաղաքացուն,- գրել է Պուշկովը:- ԱՄՆ-ը նախադեպ է ստեղծում»: Այդ կապակցությամբ նա առաջարկել է Ռուսաստանում դատել ամերիկացիների, որոնք հանցանք են գործել Ռուսաստանի տարածքում: «Այսուհետ նրանք ԱՄՆ-ին չեն հանձնվի»,- հայտարարել է պատգամավորը:
Բուտի մասին Պուշկովի թվիթին արձագանքել է Մոսկվայում ԱՄՆ դեսպանատունը՝ հայտարարելով, որ «այդպես է աշխատում ԱՄՆ-ի անկախ դատական համակարգը»: «Ամերիկյան դատարանի դատախազը խորհուրդ է տվել դատավճռի կայացման համար,- նշել են դիվանագիտական ներկայացուցչությունից:- Դատավճիռը կկայացվի անկախ դատավորների կողմից»:
Դեսպանատունը կարծում է, որ նախքան դատական գործընթացի ավարտը դրությունը մեկնաբանելը վաղաժամ է:
Դատախազները Նյու Յորքի դատարանից պահանջում են ցմահ ազատազրկման դատապարտել ռուս ձեռնարկատեր Վիկտոր Բուտին, որն անցյալ տարի մեղավոր ճանաչվեց զենքի մաքսանենգության համար: Պատժաչափի վերաբերյալ վճիռը կկայացվի ապրիլի 5-ին. Նրան սպասվում է 25 տարուց մինչև ցմահ ազատազրկում: ԻՆքը՝ Բուտը, իրեն մեղավոր չի ճանաչում:
