Ամերիկացի վարորդները, որոնք այժմ մեկ գալոն՝ 3.8լ, բենզինի համար վճարում են 4 դոլար, ճանապարհային խցանումների պատճառով տարեկան զուր այրում են ավելի քան 7.2 մլն տոննա վառելիք: Այս մասին ասվում է ԱՄՆ-ի տրանսպորտի նախարարության նոր զեկույցում:
Խցանումները վարորդներին տարեկան արժենում են 100 մլրդ դոլար, եթե հաշվի առնվի «զուր ծախսված բենզինն ու կորցրած ժամանակը»,- նշել են նախարարության փորձագետները:
Վերլուծության մեջ նաև նշվում է, որ ավտոմայրուղիների վատ վիճակի պատճառով միջին վարորդը, որը պարբերաբար օգտվում է մեքենայից քաղաքային պայմաններում, ստիպված է լինում մեքենայի վերանորոգման համար տարեկան լրացուցիչ ծախսել ավելի քան 400 դոլար:
ԱՄՆ-ի նախագահ Բարաք Օբաման դեռ 2010 թ. սեպտեմբերին խոստացել էր առաջիկա 6 տարիների ընթացքում վերանորոգել ավելի քան 240 հազար կմ ճանապարհ, բացի այդ՝ հարթել և վերանորոգել ավելի քան 6.4 հազ կմ
երկաթուղիներ: Նաև ակնկալվում է արդիականացնել օդային երթևեկության կառավարման համակարգը:
Տրանսպորտային ցանցի նորացման ծրագրի համար 2013-2014 թթ. Օբամայի վարչակազմը հուսով է Կոնգրեսից ստանալ 109 մլրդ դոլար,- տեղեկացնում է ԻՏԱՌ – ՏԱՍՍ-ը:
