ԱՄՆ–ը ողջունում է Իրանի հոգևոր առաջնորդ Այաթոլլահ Ալի Խամենեի կարծիքը, ով ասել է, որ միջուկային զենքը հակասում է իսլամի նորմերին։ Ինչպես գրում է rosbalt.ru–ն, այս մասին հայտարարել է պետքարտուղար Հիլարի Քլինթոնը:
Դիվանագետի խոսքերով՝ նա Իրանի միջուկային խնդիրը քննարկել է Թուրքիայի վարչապետ Ռեջեփ Թայիփ Էրդողանի հետ:
«Թուրքական պատվիրակությունից ասացին, որ Այաթոլլահ Ալի Խամենեին գտնում է, որ զանգվածային ոչնչացման զենքը հակասում է իսլամին: Սակայն միջազգային հանրությունը, իհարկե, հիմա ուզում է նման հայտարարությունը հաստատող իրական քայլեր տեսնել»,- նշել է ամերիկյան դիվանագիտության ղեկավարը:
Սաուդյան Արաբիայի մայրաքաղաք Էր-Ռիյադում մարտի 30-ին պետքարտուղարը հաստատել է, որ «վեցնյակի»` Մեծ Բրիտանիա, Գերմանիա, Չինաստան, Ռուսաստան, ԱՄՆ և Ֆրանսիա, միջուկային խնդրի առանչությամբ բանակցությունները Թեհրանի հետ տեղի կունենան ապրիլի 13-14-ը՝ Ստամբուլում:
«Մենք այդ բանակցություններին գնում ենք սթափ՝ գիտակցելով կարգավորման հեռանկարները»,– ընդգծել է Հիլարի Քլինթոնը: Իրանը պետք է իր գործողություններով ցույց տա, որ գործընկեր է, պատրաստ է հանդիպման գնալ և այդ բանակցություններում մասնակցություն ունենալ՝ կոնկրետ արդյունքների հասնելու նպատակով:
Հիշեցնենք, որ ավելի վաղ ԲԻՐԿՍ-ի երկրները (Բրազիլիա, Ռուսաստան, Հնդկաստան, Չինաստան, Հարավաֆրիկյան Հանրապետություն) զգուշացրել էին Իրանի շուրջ իրադրության կոնֆլիկտի վերածվելու դեպքում աղետալի հետևանքների մասին: Իսկ այսօր Թուրքիայի վարչապետն Իսրայելին զգուշացրել է Իրանի միջուկային օբյեկտներով Թել Ավիվը ռմբակոծելու պարագայում տարածաշրջանին սպառնացող աղետի մասին: