Օբամայի վարչակազմը սիրիական ընդդիմությանը կտրամադրի կապի միջոցներ և կհատկացնի «լրացուցիչ 12,2 միլիոն դոլար՝ սիրացի ժողովրդին մարդասիրական օգնություն ցուցաբերելու համար»: Ինչպես հաղորդում է ИТАР-ТАСС-ը, այս մասին «Սիրիայի բարեկամներ» խմբի համաժողովի ժամանակ հայտարարել է ԱՄՆ պետքարտուղար Հիլարի Քլինթոնը:
Նրա խոսքերով՝ կապի միջոցներն անհրաժեշտ են «ընդդիմության ուժերին՝ իրենց գործողությունները կազմակերպելու համար, որպեսզի նրանք կարողանան արտաքին աշխարհի հետ կապ պահպանել և խուսափել հարձակումներից»: «Մենք միջազգային գործընկերների հետ քննարկում ենք, թե ինչ կերպ ընդլայնենք այդ օգնությունը»,- նշել է նա:
Հիլարի Քլինթոնը չի թաքցրել, որ կասկածում է թե սիրիական կառավարությունը ճգնաժամը խաղաղ կարգավորման ճանապարհով կլուծի, ինչն առաջարկել է ՄԱԿ–ի և ԱՊԼ–ի հատուկ պատվիրակ Քոֆի Անանը:
«Արդեն մոտ մեկ շաբաթ է անցել, ինչ Ասադը համաձայնել է հետևել այդ ծրագրին, և դա կարելի է ավելացնել խոստումների երկար ցուցակին, որոնք նա չի կատարել: Աշխարհը կդատի Ասադի անկեղծությունը ոչ թե նրա խոսքերով, այլ գործերով»,-նշել է Քլինթոնը։
Ֆորումի ավարտից հետո նա լրագրողներին ասել է, որ Ասադն «այլևս ժամանակ չունի Անանի ծրագրի կյանքի կոչելը երկարաձգելու»:
ԱՄՆ–ի տրամադրած գումարն արդեն մոտ 25 միլիոն դոլար է:
«Սիրիայի բարեկամներ» խմբի երկրորդ համաժողովը տեղի է ունեցել Ստամբուլում: