Ինչպես հաղորդում են լեհական լրատվամիջոցները, երեկ Լեհաստանի ներքին գործերի նախարար Էժի Միլերը հայտարարել է, որ ավիադիսպետչերները կարող էին կանխել ինքնաթիռի կործանումը: Նրանք չեն արգելել ինքնաթիռի անձնակազմին անել դա եղանակային վատ պայմանների պատճառով:
Հիշեցնենք, որ մի քանի օր առաջ միջպետական ավիացիոն կոմիտեն հրապարակել էր իր եզրակացությունը, որի համաձայն, որպես ինքնաթիռի կործանման պատճառ էին հայտարարվել անձնակազմի ոչ արհեստավարժ գործողությունները: Ավելին, կոմիտեն նշել էր, որ օդանավի հրամանատարի վրա ճնշում էր գործադրել ռազմաօդային ուժերի հրամանատար Բլասիկը, որն այդ պահին գտնվել էր օդաչուների խցում և պարտադրել էր վատ եղանակային պայմաններում վայրէջք իրականացնել:
Միջպետական ավիացիոն կոմիտեն երեկ հայտարարություն է տարածել, որում ասվում է, որ իրենց կայքում ստիպված են հրապարակել դիսպետչերի և օդաչուների խոսակցությունները, որպեսզի ավելորդ շահարկումները դադարեն: իսկ հրապարակման պատճառ, ըստ կոմիտեի հայտարարության, եղել են Լեհաստանի ՆԳ նախարարի ոչ միանշանակ հայտարարությունները:
Հիշեցնենք նաև, որ երեկ Լեհաստանի զոհված նախագահի դուստրը ռուսական կողմին մեղադրել էր դիտավորությամբ հորը սպանելու մեջ, իսկ ավելի վաղ Յարոսլավ Կաչինսկին ասել էր, թե Ռուսաստանի գործողությունները «Լեհաստանին ուղղված ծաղր են»: