Հայաստանում Մեծ Բրիտանիայի Միացյալ Թագավորության դեսպանությունում հրաժարվել են մուտքի արտոնագիր տրամադրել Հայ Առաքելական Եկեղեցու Շիրակի թեմի առաջնորդ Միքայել եպիսկոպոս Աջապահյանին։ Աջապահյանը Մեծ Բրիտանիա էր մեկնում` մասնակցելու միջազգային համաժողովի: Նրա խոսքերով, մերժման պատճառն այն էր, որ հրավերի բնօրինակը չի ներկայացվել. «Մեզ հրավերն ուղարկվել է էլեկտրոնային տարբերակով, կարող էին նախապես տեղեկացնել, մենք բնօրինակը եւս կապահովեինք: Սակայն մեզ հրավիրել էին դեսպանատուն, գնացինք, ասեցին, թե մերժված ենք բնօրինակ չունենալու պատճառով. դա կոռեկտ չէր»:
Աջապահյանը տեղեկացրեց, որ հրավիրող կողմն արդեն բնօրինակն ուղարկել է, իսկ դեսպանատնից ստացվել է հաղորդագրություն, որ կարող են վերստին դիմել. «Ես իմ ցանկությամբ չեմ գնում, սա գործուղում է Մայր Աթոռի կողմից, եւ եթե Մայր Աթոռը նպատակահարմար է գտնում վերստին դիմելու, ապա կդիմենք»:
Աջապահյանը նշեց, որ դեսպանատան աշխատակցի կեցվածքն անպարկեշտ է եղել. «Երբ ես ասացի՝ վերջիվերջո, ձեզ դիմողը թեմի առաջնորդ է եւ դիվանագիտական անձնագիր ունի, ինձ պատասխանեցին, թե ինչո՞ւ եք Ձեզ ժողովրդից զանազանում, եւ Ձեր գործը թողած` պետք է ժողովրդով զբաղվեք»: