General Electric ընկերության գլխավոր տնօրեն Ջեֆ Իմելթը շարունակում է չեզոք մնալ ԱՄՆ նախագահական ընտրությունների ժամանակ այս կամ այն թեկնածուին աջակցելու հարցում: Այս մասին հաղորդել են ամերիկյան խոշորագույն ընկերությունից:
Իմելթը, որը հասարակական հիմունքներով համարվում է նաև Բարաք Օբամայի` տնտեսական հարցերով խորհրդականը, ըստ Fox Business-ի, հիասթափվել է Սպիտակ տան վարած քաղաքականությունից և ակտիվորեն աջակցում է Օբամայի թիվ մեկ մրցակցին` հանրապետական Միթ Ռոմնիին:
Bloomberg-ի համար մեկնաբանելով այս հրապարակումը` General Electric-ի մամուլի քարտուղարն այս ամենն «անհեթեթություն» է որակել. «Ջեֆը մեկ անգամ չէ, որ ասել է` նախագահը հոյակապ գործընկեր է: Նա ասել է, որ նախագահն ունակ է լսելու փաստարկները և ակտիվ կերպով մասնակցում է գործազրկության դեմ պայքարի խորհրդի աշխատանքներին»,- նշել են General Electric-ում:
Տեղեկացնենք նաև, որ հանրապետականները 2008թ.-ին մեկ անգամ չէ, որ Իմելթին մեղադրում էին Օբամային աջակցելու մեջ: Նրանք նշում էին, որ General Electric-ին պատկանող NBC-ին և MSNBC-ին ակտիվորեն քարոզում են հօգուտ Դեմոկրատական կուսակցության ներկայացուցչի: