РИА Новости-ի փոխանցմամբ՝ սպառազինության վերահսկման և միջազգային անվտանգության հարցերով ԱՄՆ փոխպետքարտուղար Ռոուզ Գետտեմյուլերը հայտարարել է, որ «Վեցյակի» հետ Իրանի բանակցությունների ժամանակ ԱՄՆ-ը հուսով է Իրանից ստանալ նրա միջուկային ծրագրին առնչվող մի շարք հարցերի պատասխաններ.
«Իրանն ունի խաղաղ ատոմի մշակման իրավունք: Սակայն այժմ ծագել են բազմաթիվ հարցեր՝ կապված նրա միջուկային ծրագրի հետ: Մենք հուսով ենք, որ Իրանի և «Վեցյակի» միջև առաջիկա բանակցություններում մեզ կհաջողվի ստանալ մի շարք հարցերի պատասխաններ:
Հուսով ենք, որ այդ բանակցություններում կհաջողվի համոզել Իրանին՝ միջազգային պայմանավորվածությունների շրջանակներում գործելու շուրջ: Մեզանից ոչ մեկն էլ տարածաշրջանում չի ցանկանում պատերազմ. ո՛չ ԱՄՆ-ը, ո՛չ էլ Արևմուտքը»:
Հիշեցնենք, որ երեկ Մոսկվայում Իրանի դեսպան Սեյեդ Մահմուդռեզա Սաջադին հայտարարել է, որ Իրանի և «Վեցյակի» միջև բանակցությունները հետաձգվել են մեկ օրով և կայանալու են ապրիլի 14-ին: Բանակցությունների անցկացման վայրը ցայժմ մնում է անհայտ:
