1935թ. այս օրը մահացավ հայ երգահան, երաժշտագետ, խմբավար և մանկավարժ Ռոմանոս Հովակիմի Մելիքյանը: Նա հայ երաժշտության նշանավոր դեմքերից է:
Ծնվել է 1883թ. հոկտեմբերի 1-ին Կիզլյարում (Դաղստան): Հայրենադարձվել է Հայաստան 1921թ., որտեղ հիմնել և ղեկավարել է բազում երագչախմբեր: Համարվում է ազգային դասական ռոմանսի հիմնադիրը, հեղինակ է բազմաթիվ ռոմանսների, որոնցից առավել հայտնի են «Աշնան տողեր», «Զմրուխտի», «Զառ-զառ», «Նոր օրերի երգեր» վոկալ շարքը: Նրա անունն է կրում Երևանի երաժշտական դպրոցներից մեկը:
Նա պատմության մեջ մտավ որպես ինքնատիպ տաղանդի տեր նրբազգաց արվեստագետ, իր ժամանակի առաջադեմ միտումներն ու խնդիրներն արծարծած գործիչ:
Նրա «Զմրուխտի» երգաշարում բյուրեղացավ հայկական ռոմանսի վառ ազգային ոճը: Իր հասարակական գործունեությամբ մեծապես նպաստեց Հայաստանում նոր երաժշտական մշակույթի ստեղծմանը, երաժշտական-լուսավորչական գործի կազմակերպմանը:
Այդ իմաստով առանձնապես արգասաբեր էին նրա ջանքերը Երևանում երաժշտական ստուդիայի (1921), ապա կոնսերվատորիայի (1923) հիմնադրման, ինքնագործ երգչախմբերի ստեղծման ու ղեկավարման ուղղությամբ: