«Առաջին լրատվական»-ի զրուցակիցն է Ստամբուլի «Ժամանակ» օրաթերթի խմբագիր Արա Գոչունյանը
– Սույն թվականի հունիս ամսին Թուրքիայում սպասվում են խորհրդարանական ընտրություններ: Ինչպիսի՞ն է տրամադրությունը Ստամբուլում ընտրություններից առաջ:
– Ժողովրդավարացման գործընթացի ամրապնդման հանգրվանում խորհրդարանական ընտրությունների նկատմամբ հետաքրքրությունը բավականին մեծ է: Անցյալ տարվա աշնանը կայացած հանրաքվեից հետո երկիրը ընդհանրապես նախընտրական մթնոլորտից աստիճանաբար սկսեց դուրս գալ: Բնականաբար, դեռևս երկար ժամանակ կա, բայց արդեն հետզհետե նկատվում է, որ քաղաքական շրջանակները, քաղաքական աշխարհը ուշադրությունը լրիվ սևեռել են առաջիկա ընտրությունների վրա: Թուրքիայի տնտեսությունը բավականին կայուն տեմպով զարգանում է, և երկրի միջազգային հեղինակությունը բավականին ամրապնդված է այդ շրջանում, իհարկե կան թերություններ ու պրոբլեմներ, սակայն այդ ամենով հանդերձ` մեկնաբանությունները բավականին լավատես են իշխող վարչապետ Էրդողանի գլխավորած կուսակցության վերաբերյալ:
– Արդյոք հայկական համայնքը նախապատվությունը կտա՞ իշխող «Արդարություն և զարգացում» կուսակցությանը:
– Բնականաբար, միանշանակ չի կարելի ասել, որ Թուրքիայի հայ համայնքի անդամները բոլորն են կողմնակից են այս կամ այն կուսակցության: Թուրքիայի հայ համայնքի անհատներն իրենց ասպասելիքներով, իրենց քաղաքացիական դիրքորոշումով առաջնորդվելիս նախընտրում են մի կուսակցություն, և մենք չենք կարող ասել, որ իշխող կուսակցության քաղաքական գործունեությունը միանշանակ ընդունելի է կամ ոչ համայնքի համար, բայց ընդհանուր առմամբ կարելի է ասել, որ ժողովրդավարական նախաձեռնությունները, բնականաբար, փոքրամասնությունների և հայ համայնքի մոտ դրական են ընկալվում, և բազմաթիվ բարեփոխումներ են եղել փոքրամասնությունների համար, և այդ բարեփոխումներից անմասն չեն մնացել Թուրքիայի հայկական զանազան կառույցները:
– Խոսակցություններ կան, որ եթե ընտրություններում հաղթի իշխող կուսակցությունը, ապա հայ-թուրքական հարաբերությունները փոփոխություններ կկրեն: Հավանակա՞ն եք համարում, որ ընտրություններից հետո ինչ որ բան կփոխվի: