РИА-Новости գործակալության հաղորդմամբ, Ռուսաստանի Դաշնության նախագահ Դմիտրի Մեդվեդևը Պաղեստինի ինքնավարություն կատարած այցի ժամանակ հայտարարել է, որ պաղեստինցիներն իրավունք ունեն ստեղծելու իրենց պետությունը` Արևելյան Երուսաղեմ մայրաքաղաքով:
«Մենք աջակցել ենք և շարունակելու ենք աջակցել պաղեստինյան ժողովրդի` սեփական պետությունն ունենալու իրավունքը` անկախ, միասնական, Արևելյան Երուսաղեմ մայրաքաղաքով»,- նշել է նա:
Բացի այդ, նա ասել է, որ խաղաղության գործընթացի վերականգնման համար անհրաժեշտ է, որպեսզի Իսրայելը դադարեցնի շինարարությունը պաղեստինյան տարածքներում` Հորդանան գետի արևմտյան ափին և Երուսաղեմի արևելյան հատվածում:
Դրանով Մեդվեդևը ցույց է տվել, որ պաշտոնական Մոսկվան կողմ է մինչև 1967թ. գոյություն ունեցող սահմաններին, որոնք խախտվել էին հօգուտ Իսրայելի` այդ թվականին սկված 6-օրյա պատերազմի հետևանքով:
Սակայն Մեդվեդևը չի հայտարարել, որ ճանաչում է Պաղեստին պետությունը, ինչը նրանից սպասում էին արաբները, և ինչից մտավախություն ունեին հրեաները:
Հիշեցնենք միայն, որ վերջին մի քանի ամիսների ընթացքում Պաղեստինի ճանաչման գործընթաց է սկսվել: Առավել ակտիվն այս հարցում լատինաամերիկյան պետություններն են: