Մուհամմեդ Մերայի հայրը հանձնարարել է ալժիրցի փաստաբանին` մինչև Ֆրանսիայի դատարան հասցնել հատուկ ջոկատայիների կողմից իր որդու սպանությունը:
Ինչպես հաղորդում է Interfax գործակալությունը` հղում անելով ֆրանսիական ԶԼՄ-ներին, այս մասին հայտարարել է փաստաբան Զախիյա Մոխթարին:
«Պարոն Մերան մարտի 27-ին եկավ Ալժիր, որպեսզի պաշտոնապես հանձնարարի մեզ հետաքննել ֆրանսիական անվտանգության ծառայության (Raid) հետապնդման օրինականությունը, հետևել Մուհամմեդ Մերային բռնելու փորձի ողջ ընթացքին ու նրա սպանությանը»,- ասել է Մոխթարին:
«Պարոն Մերան կարծում է, որ իր որդին սպանվել է: Նա մեզ հանձնարարել է բողոք ներկայացնել ֆրանսիական անվտանգության ծառայության դեմ»,- ասել է փաստաբանը` հավելելով, որ գործընթացը կսկվի Մերա կրտսերի թաղումից անմիջապես հետո:
Փաստաբանն ընդգծել է, որ Ֆրանսիայի և Ալժիրի միջև կնքված համաձայնագրի համաձայն` երկու երկրների փաստաբանները թույլտվություն ունեն դատական գործընթացներ իրականացնելու թե՛ այս, թե՛ այն երկրում:
Ավելի վաղ Մուհամմեդ Բենալել Մերան հայտարարել էր, որ ֆրանսիական իշխանությունները չեն կարող արգելել իրեն ելույթ ունենալ ի պաշտպանություն որդու: Այս մասին հայտնում է եգիպտական «Աշ-Շուրուկը»:
Հիշեցնենք, որ ալժիրյան ծագումով ֆրանսիացի Մուհամմեդ Մերան 2012 թ. մարտին Ֆրանսիայի հարավում մի շարք սպանություններ ղր իրականացրել: Նրա ձեռքով սպանվել էր յոթ մարդ` հրեական քոլեջի երեք աշակերտներ, նրանց ուսուցիչը և երեք զինվորականներ:
