ՀՀ սպառողները հայտնվել են մոլորության մեջ, քանի որ մեկը մյուսի հետեւից ՀՀ սպառողական շուկայում գների նոր թանկացումներ են արձանագրվում: Շաքարավազը թանկացել է 10-15 դրամով, ընդ որում` հենց նույն օրը, երբ Սերժ Սարգսյանը մասնակցեց շաքարի արտադրամասի բացմանը: Իսկ ձեթն այս օրերին թանկացել է 30-50 դրամով: ՀՀ սպառողական շուկայում տիրող գնային վազքը հասկանալու համար դիմեցինք Տնտեսական մրցակցության պաշտպանության հանձնաժողովի մամուլի քարտուղար Նելլի Դանիելյանին: Նա նկատեց, որ գների թանկացման վերաբերյալ ներկա դրությամբ արագ կողմնորոշվելու խնդիր կա, հետեւաբար իրենք տնտեսվարող սուբյեկտներին հանձնաժողով են հրավիրել ոչ թե գրավոր, այլ բանավոր ընթացակարգով: «Նրանք կարող է այսօր ներկայանան, կարող է եւ` վաղը: Հետեւաբար` առաջիկա օրերին, միայն տնտեսվարողների հետ հանդիպելուց հետո կպարզվի, թե ինչն է սպառողական շուկայում տեղի ունեցած եւ ունեցող գների փոփոխության պատճառը»,- տեղեկացրեց Նելլի Դանիելյանը: Իսկ սպառողների իրավունքների պաշտպանության ՀԿ-ի նախագահ Աբգար Եղոյանը նկատեց, որ մեր շուկայում տիրող գնային քաղաքականությունը այսօր արդեն դարձել է մեր երկրի գլխավոր խնդիրներից մեկը: «Ես գների թանկացման վերաբերյալ մեկնաբանությունները արդեն չեմ կարողանում տալ: Մեզ մոտ ոչինչ չի էժանանում, բայց օր օրի թանկացումներ են տեղի ունենում: Իսկ աշխատավարձները մնում են նույնը: Նոր տարին էլ է մոտենում, ինչը նշանակում է, որ թանկացումների նոր ալիք է սպասվում: Հետեւաբար` անկեղծորեն ես արդեն ստեղծված իրավիճակից դուրս գալու ոչ մի մեխանիզմ չեմ տեսնում»,- ավելացրեց Աբգար Եղոյանը:
