Վրաստանի կառավարությունը ողջունում է այլ երկրներին աջակցող ամերիկյան խոշորագույն գործակալություններից մեկի` «Հազարամյակի մարտահրավերներ» կորպորացիայի որոշումը, որով Վրաստանին արդեն երկրորդ դրամաշնորհն է հատկացվելու 5 տարի ժամկետով,- հաղորդում է eurasianet.org կայքը: Միջոցների հատկացման մասին որոշումը հետագայում կկայացնի կորպորացիայի թբիլիսյան գրասենյակը՝ կառավարության ներկայացրած նախագծի համաձայն: Այս տարվա ապրիլին Վրաստանը ավարտելու է առաջին դրամաշնորհով նախատեսված ծրագրերի իրականացումը: Երկրորդ դրամաշնորհը բացառիկ հաջողությունների համար, Վրաստանից բացի, տրամադրվել է նաև Գանային: Այդ բացառիկ հաջողություններն են առաջին դրամաշնորհի ծրագրերի հաջող իրականացումը, բարեփոխումների ընթացքում հավաքած բալերի քանակն ու համապատասխան միջոցների առկայությունը: Նշենք, որ երկրորդ դրամաշնորհի մասին որոշումը դեռ պետք է հաստատվի ԱՄՆ Կոնգրեսում: Որոշման մասին հայտարարվելուց հետո ԱՄՆ պետքարտուղար Հիլարի Քլինթոնն ասել էր, որ երկրորդ անգամ դրամաշնորհ շահած պետությունը հայտնվում է առանձնահատուկ կարգավիճակում: Վրացական իշխանությունները երկրորդ գրանտի շրջանակներում առաջնահերթություն են տալու կրթության և տրանսպորտային ենթակառուցվածքների զարգացմանը: