«Առաջին լրատվական»-ի հետ զրույցում ՀՀԿ փոխնախագահ Ռազմիկ Զոհրաբյանը այն հարցին ի պատասխան, թե Սերժ Սարգսյանի վերջին ելույթներից մեկում զոռբայության մասին հնչեցրած մտքերին ինչպե՞ս է գործնականում արձագանքել Հանրապետականը, ասաց, թե պայքարն այնպիսի երևույթ է, որ այստեղ նաև զոռբայություն է պետք:
«Առանց զոռբայության պայքար չի լինում, բայց այդ պայքարը պետք է լինի օրենքի սահմաններում, և մենք ամեն անգամ աշխատում ենք, որ այդ օրենքի ուժը պահպանենք: Մենք ունենք Սահմանադրություն, մենք ունենք օրենքներ, և համապատասխան դրանց ենք գործում: Բնականաբար, ովքեր չափը անցնում են, նրանց հանդեպ մենք կարգապահական վերաբերմունք ենք դրսևորում: Ինչ վերաբերում է Գագիկ Բեգլարյանին, գիտեք, այստեղ այլ հարթություն է։ Կարելի է ասել՝ մի քիչ թյուրիմացություն տեղի ունեցավ: Ավելի ճիշտ՝ կրքերի լարում տեղի ունեցավ, այլ ոչ թե հատուկ միտումնավոր օրենքի խախտումներ եղան: Կրքերի լարման արդյունքում նույնիսկ մեծ պատերազմներ են ծագում: Նույնը՝ անձերի միջև։ Ընդհանրապես, մենք հայ ենք, և որքան էլ ասենք, թե եվրոպական արժեքները մեզ մոտ են, այնուամենայնիվ, մեզանում արևելյան պատվախնդրությունն է խոսում, երբ հարցը վերաբերում է մեր անձին, մեր տիկնոջը, երեխային: Այդ պահին կրքերի զգացմունքային լարում է տեղի ունենում: Ցանկանում եմ ասել, որ Գագիկ Բեգլարյանը հատուկ օրինախախտ չի։ Մենք գիտենք Գագիկ Բեգլարյանի հնարավորությունները, իրեն աջակցող շրջապատը: Իհարկե, քաղաքապետի պաշտոնից զրկելը պատիժ էր, բայց նա մնում է կուսակցության անդամ: Նա կուսակցությունից դուրս գալու դիմում չի գրել, մենք էլ չենք պահանջում: Ապագայում ևս կուսակցությանն է աջակցելու, քանի որ նա կուսակցության անդամ է:
«Գագիկ Բեգլարյանը արդյոք վիրավորված չէ՞ իր հանդեպ վերաբերմունքից, նա ցանկություն ունի՞ շարունակելու գործունեությունը Հանրապետականում» հարցին Ռազմիկ Զոհրաբյանը պատասխանեց. «Հանրապետական կուսակցության մեջ եղել են շատ դեպքեր, երբ կուսակցությանը անդամակցող անձը խախտումներ է թույլ տվել ու պատժվել դրա համար: Սակայն հետագայում վերականգնվել է և շատ շատերից առավել է աջակցել կուսակցության գործերին: Կուսակցությունը ունի և՛ պատժելու, և՛ խրախուսելու եղանակներ: Այնպես որ, եթե մեկին պատժում են, չի նշանակում, որ նրա ճակատին դաջվեց, թե այլևս չի վերադառնալու և իր սխալները չի ուղղելու: Ինչ վերաբերում է, թե ապագայում որտեղ եմ տեսնում Գագիկ Բեգլարյանի գործունեությունը, հետագայում կերևա: Չմոռանանք, որ Գագիկ Բեգլարյանը կարող անձ է, ունի և՛ շրջապատ, և՛ հարգանք: Միայն վերջին դեպքով պետք չէ նրան որպես անհատ գնահատել»: