Defense-aerospace-ի փոխանցմամբ՝ Թուրքիայի պաշտպանական արդյունաբերության ենթաքարտուղարությունը ներկայացրել է ռազմավարական հնգամյա պլանը, որում խոսք է գնում պաշտպանական ոլորտի հիմնական նախագծերի ավարտի կոնկրետ ժամկետների մասին: Ակնկալվում է, որ այդ նախագծերն ավելի բարձր մակարդակի կհասցնեն երկրի ռազմական արդյունաբերությունը:
Պլանի համաձայն՝ թուրքական Altay տանկի ստեղծման նախագիծը պետք է ավարտվի մինչև 2015 թվականը: Թուրքական արտադրության առաջին էսկադրոնային ականակիրը Թուրքիայի ռազմածովային ուժերը համալրելու է 2016 թվականին: Atak ուղղաթիռը և Anka անօդաչու թռչող սարքը (ԱԹՍ) զինված ուժերը կհամալրեն համապատասխանաբար՝ 2013 և 2014 թվականներին:
Ըստ ռազմավարական պլանի՝ 2011 թվականից իրագործվել է ավելի քան 280 նախագիծ: Վերջին մեկ տարում կնքված պայմանագրերի վերջնական արժեքը կազմել է մոտ 27.3 միլիարդ դոլար:
Թուրքական իշխանությունները վստահ են, որ հետագա հինգ տարիների ընթացքում երկրի պաշտպանական արդյունաբերությունը մտնելու է աշխարհի լավագույն տասնյակի մեջ: Մինչև 2016 թվականը պաշտպանական ու օդա-տիեզերական արդյունաբերության արտահանումը պետք է կազմի 2 միլիարդ դոլար:
Բացի այդ, Թուրքիան իր կապի բաժանմունքներն է ստեղծելու Միջին ու Մերձավոր Արևելքում, ԱՄՆ-ում, Կովկասում, Կենտրոնական Ասիայում ու Եվրոպայում:
