«Կեսգիշերային» դիվանագիտություն Անկարայում

Իրանական «Mehr» գործակալության հաղորդմամբ, Իրանի ԱԳ նախարարի պաշտոնակատար Ալի Աքբար Սալեհին, որը հունվարի 17-ի երեկոյան մեկնել էր Թուրքիա, հյուրընկալվել է Թուրքիայի ԱԳ նախարար Ահմեդ Դավութօղլուի սեփական տանը:
Թուրքական «Zaman»-ը հաղորդել է, որ Թուրքիայի ԱԳ նախարար Դավութօղլուն, Սալեհիին ընդունելով, հայտարարել է. «Իրանի և Թուրքիայի հարաբերությունները տարածաշրջանում կայունություն հաստատելու խնդրում խիստ կարևորություն ունեն»:
Դավութօղլուն, անդրադառնալով Ստամբուլում Իրանի և «վեցյակի» միջև կայանալիք բանակցություններին, նաև ասել է. «Թուրքիան լրջորեն հետևում է բանակցություններին առնչվող բոլոր գործընթացներին»։
Թուրքիայի ԱԳ նախարարը, Սալեհիի դիվանագիտական կարողությունները գնահատելով ու միաժամանակ Իրանի և Թուրքիայի հարաբերությունների կարևորությունը մատնանշելով, Սալեհիի այցը համարել է «կեսգիշերային դիվանագիտություն» և ավելացրել. «Ես շատ երջանիկ եմ, որ իմ տանը հյուրընկալեցի Ալի Աքբար Սալեհիին»:
Սալեհին հիշյալ հանդիպման ընթացքում, Իրանի և Թուրքիայի պատմական հարաբերությունները մատնանշելով, տարածաշրջանի կայունության հաստատման գործում կարևորել է նաև Սիրիայի և Սաուդյան Արաբիայի դերակատարությունը:
Սալեհին և Դավութօղլուն հանդիպման ընթացքում քննարկել են Իրանի միջուկայի աշխատանքներն ու դրա շուրջ ընթացող բանակցությունները, նաև՝ Լիբանանում ստեղծված իրավիճակը: Սալեհին Լիբանանի ներքաղաքական խնդիրները կարգավորելու գործում կարևորել է լիբանանյան ներքին շարժումների համագործակցությունը և հայտարարել. «Լիբանանի ներքին խնդիրները լուծվելու են հենց ներքին շարժումների՝ միմյանց հետ համագործակցելու և զգոնության միջոցով»։
Իրանի ԱԳ նախարարի պաշտոնակատար Ալի Աքբար Սալեհին նաև Անկարայի օդանավակայանում իրանական «IRNA» գործակալության հետ ունեցած զրույցի ընթացքում հայտարարել է. «Իրանի և Թուրքիայի հարաբերությունները խիստ սերտացած են, և հենց այդ պատճառով է հաճախ նմանօրինակ հանդիպումների կարիք զգացվում: Երկու երկրների նախագահներն ու բարձրաստիճան դիվնագետները միշտ կապի մեջ են միմյանց հետ։ Շուտով Իրանի նախագահը Թեհրանում հյուընկալելու է Թուրքիայի նախագահ Աբդուլլահ Գյուլին»։