Օրերս տեղեկացրել էինք այն մասին, որ Իրանի պետական հեռուստաընկերությունը ցուցադրել է մի ահաբեկչի խոստովանություն, համաձայն որի` հրեական «Մոսադի» գործակալները իր հետ հանդիպել էին Հայաստանում` իրեն վճարելով Իրանի միջուկային բարձրաստիճան փորձագետ Մասուդ Ալիմուհամադիին սպանելու համար:
Իրանի անվտանգության ծառայությունները հունվարի 10-ին հայտնել էին, որ ձերբակալել են անցյալ տարի Իրանի միջուկային բարձրաստիճան փորձագետ Մասուդ Ալիմուհամադիին սպանած ահաբեկիչներին, որոնք աշխատում էին իսրայելական «Մոսադի» պատվերով: Մի քանի օր առաջ Իրանի պետական հեռուստաընկերությունը հրապարակել էր այդ ահաբեկիչներից մեկի՝ Մաջիդ Ջամալիֆաշի խոստովանությունները՝ նշելով, թե շուտով կհեռարձակվի վերջինիս ամբողջ խոստովանությունը: Իրանի պետական հեռուստաընկերությունը օրերս, Irna գործակալության փոխանցմամբ, «Կարմիր լուսամուտ» հաղորդաշարով հեռարձակել է Մաջիդ Ջամալիֆաշի խոստովանությունները: Նա պատմել է, թե «Մոսադի» գործակալները ինչպես են իր հետ կապ հաստատել, և ինչպես է ինքը վարժանքների մասնակցել Իսրայելում: Ջամալիֆաշը բացահայտել է մի չափազանց ուշագրավ փաստ: Նա հայտնել է, որ «Մոսադի» գործակալները վերջին անգամ իր հետ հանդիպել են Հայաստանում. «Ինձ ասել էին, որ շարունակեմ ապրել բնականոն կյանքով, ոչ մի լուրի չարձագանքեմ, մինչև իրենք կապ հաստատեն ինձ հետ: Հետո որոշվեց, որ մենք իրանական Նոր տարվա օրերին (մարտ ամսին) հանդիպենք Իրանի հարևան երկրներից մեկում։ Հանդիպումը հետո մեկ ամսով հետաձգվեց: Մեկ ամիս անց ես ցամաքով մեկնեցի Հայաստան, որտեղ երկու օրվա ընթացքում պետք է հանդիպեի միջնորդների հետ: Առաջին օրը մի հյուրանոցում հանդիպեցինք, և ես նրանց բացատրեցի իմ ծրագիրը: Իսկ երկրորդ օրը նրանք ինձ հանձնեցին 35 հազար դոլար, որը երկու պայուսակի մեջ էին տեղավորել, ու հավելեցին՝ մենք այս գործողության համար (միջուկային փորձագետի ահաբեկչությունը նկատի ունի) քեզ 50 հազար դոլարով ենք վարձատրելու, բայց ամբողջ գումարը մեկտեղ չենք հանձնելու, դու վերադարձիր, սովորական աշխատանքով զբաղվիր, մինչև կտեղեկացնենք գործողության ժամկետը: Հետևաբար, նրանք իմ վարձատրության գրեթե կեսը չհանձնեցին»։
Վերոնշյալ տեղեկատվությունից կարելի է բխեցնել, որ Հայաստանը, փաստորեն, տարանցիկ երկիր է դարձել ոչ միայն արգելված նյութերի, այլև «Մոսադի» կողմից հատուկ գործողություններ պատվիրելու համար։ Իսկ ահա փորձագետները ուշադրություն են հրավիրում այն հանգամանքին, որ եթե «Մոսադը» նման հատուկ օպերացիաներ իրականացնելու ճանապարհին Իրանի հարևան երկրների շարքում «ամենահարմար» երկիր է համարել Հայաստանը, դա վկայում է այն մասին, որ Իրանի հարևան պետություններից ամենաթույլը Հայաստանի հատուկ ծառայություններն են, քանի որ այստեղ նրանք իրենց ավելի ազատ են զգացել, քան կզգային Իրանի հարևան որևէ մի այլ երկրում:
Համաձայնեք, որ խիստ վտանգավոր է այն փաստը, երբ Հայաստանի տարածքը երրորդ երկրների կողմից օգտագործվում է նման հատուկ օպերացիաների իրագործման համար` հարևան երկրի դեմ: Ասվածը, թերևս, չի կարելի չափազանցություն համարել, եթե հաշվի առնենք այն հանգամանքը, թե ինչով են զբաղված Հայաստանի հատուկ ծառայությունները երկրի ներսում` նրանց միակ խնդիրը, որի դեմ լարել են իրենց ողջ ներուժն ու կարողությունները, ընդդիմությունն է: Ուստի այս առումով բոլորովին էլ զարմանալի չէ, որ Հայաստանը ժամանակ առ ժամանակ հայտնվում է սկանդալային տարբեր պատմությունների կիզակետում: Եվ եթե Հայաստանի շուրջ իրադարձությունները զարգանան նույն թափով ու ինտենսիվությամբ, ապա թերևս հեռու չէ նաև այն օրը, երբ կպարզվի, որ Հայաստանի տարածքում տարբեր երկրների հատուկ ծառայությունները գործում են միմյանց դեմ:
«Ժամանակ» օրաթերթ
