Այսօր քաղաքապետարանում տեղի ունեցավ աշխատանքային խորհրդակցություն, որը վարում էր Երևանի քաղաքապետ Կարեն Կարապետյանը։ Մինչ օրակարգի հիմնական հարցերին անցնելը, քաղաքապետը նախ նշեց, որ առաջիկա ուրբաթ օրը Երևանի ավագանու դիտարկմանը կներկայացվի քաղաքապետարանի կառուցվածքում փոփոխություններ և լրացումներ կատարելու վերաբերյալ առաջարկությունների նախագիծ։ Կարևորվեց քաղաքապետարանի և վարչական շրջանների աշխատակազմերի լիազորությունների կանոնակարգման հարցը՝ հանձնարարելով միջոցներ ձեռնարկել դրանց ապակենտրոնացման ուղղությամբ։
Անցնելով օրակարգային հարցերին՝ Երևանի քաղաքապետը նախ անդրադարձավ մայրաքաղաքի կենտրոնում շինարարության ծավալներին՝ նշելով, որ դրանք էականորեն նվազելու են. «Բացի բակային տարածքների բարեկարգումից, Կենտրոնում որևէ այլ շինթույլտվություն սկզբունքնորեն չի տրվելու, կանաչ տարածքի հաշվին որևէ շինարարություն չի լինելու։ Ինքնակամ և ապօրինի շինարարության ոլորտում նույնպես մենք կոշտ քաղաքականություն ենք իրականացնելու»։ Վերահսկողությունը շարունակական է լինելու նաև ապօրինի առևտրի կանխարգելման ուղղությամբ։
Տրանսպորտի վարչությանը հանձնարարվեց գույքագրել ավտոկայանտեղիները և դրանք բերել օրինական դաշտ։ Հասարակական տրանսպորտի աշխատանքի արդյունավետության և ուղևորահոսքը կառավարելի դարձնելու նկատառումով առաջարկվեց տրանսպարտային նոր հայեցակարգ մշակել, այդ նպատակով մայրաքաղաքի բանուկ հատվածներում տեղադրել տեսախցիկներ։
Կարեն Կարապետյանը անդրադարձավ նաև կրթական ոլորտի կառավարմանը և շեշտադրեց, որ դպրոցների տնօրենների թափուր պաշտոնների համար հայտարարվող մրցույթներին ապահովվի առնվազն երկու թեկնածուի մասնակցություն. «Տարիներ շարունակ ձևավորվել է արատավոր համակարգ, երբ վերապատրաստման դասընթացների գնում և հավաստագրեր ստանում են միայն գործող տնօրենները, արդյունքում չկա մրցակցություն և անընդհատ վերարտադրում ենք նույն համակարգը, ինչն անթույլատրելի է»,- նկատեց քաղաքապետը։
Համապատասխան ստորաբաժանումների ղեկավարներին հանձնարարականներ տրվեցին նաև բյուջետային ապառքների հավաքագրումն ավելի արդյունավետ կազմակերպելու և քաղաքային տնտեսության մի շարք այլ ոլորտներում աշխատանքները կանոնակարգելու վերաբերյալ։
Երևանի քաղաքապետարանի տեղեկատվության
և հասարակայնության հետ կապերի վարչություն