Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում շարունակվում է քրեական հետախուզության նախկին պետ Հովհաննես Թամամյանի և ոստիկանության աշխատակիցներ Արմեն Պողոսյանի և Վահան Խանզադյանի գործով դատավարությունը, որի ընթացքում պիտի հրապարակվեն դատաճիռները: Դատարանում պաշտպանական ճառը հրապարակեց Թամամյանի պաշտպան Վաղինակ Գևորգյանը:
Վերջինս խնդրեց դատարանին պատիժ նշանակելիս հաշվի առնել, որ Թամամյանը անչափահաս երեխա ունի, նախկինում երբեք դատված չի եղել, նրա անձը բնութագրվում է դրական և պետության կողմից ստացել է բազմաթիվ պարգևատրումներ:
Պաշտպանը խնդրեց դատարանին Թամամյանի նկատմամբ նշանակել պատիժ, որը կապ չի ունենա ազատությունից զրկելու հետ, իսկ դատախազ Հարություն Հարությունյանի միջնորդությունը մյուս երկու ամբաստանյալների նկատմամբ քրեական օրենսգրքի 70 հոդվածը կիրառելու, սակայն Թամամյանի նկատմամբ այն չկիրառելու մասով պաշտպանը համարեց անարդարացի:
Պաշտպանական ճառի հրապարակումից հետո դատավորը ամբաստանյալներին տվեց վերջին խոսքի իրավունք, որից երկու ամբաստանյալները հրաժարվեցին, իսկ Թամամյանն ասաց հետևյալը. «Ես 35 տարի աշխատել եմ ոստիկանության համակարգում և եղել ու մնում եմ ոստիկանությանը նվիրյալ, ավելացնելու ոչինչ չունեմ»,- ասաց Թամամյանը: Դատավորը հեռացել է խորհրդակցական սենյակ վճիռ կայացնելու, որը կհրապարակվի մեկ ժամից:
