Վրաստանի ԱԳՆ. Օբաման և Սաակաշվիլին զենքի հարց չեն քննարկել

Այսօր Վրաստանի ԱԳՆ-ն հերքել է այն տեղեկատվությունը, համաձայն որի՝ Վրաստանի նախագահ Միխեիլ Սաակաշվիլին, պաշտոնական այցով գտնվելով ԱՄՆ-ում, իր ամերիկացի գործընկեր Բարաք Օբամայի հետ քննարկել է զենքի առաքման հարց: Այսօր մամուլում տեղ էին գտել հրապարակումներ, որոնցում մասնավորապես նշվում էր, որ խոսվել է հակահրթիռային և հակատանկային պաշտպանության համակարգերի գնման մասին:
Ռուսական Коммерсант թերթը գրում է, որ ամերիկյան կողմն այդ հարցին հստակ պատասխաններ չի տվել, և այն բաց է մնացել: Թերթը նաև հայտնում է, որ Մոսկվան դիվանագիտական խողովակներով տեղյակ էր պահել Վաշինգտոնին, թե խիստ բացասաբար է վերաբերվում Սպիտակ տանը Սաակաշվիլուն ընդունելուն:
Թեպետ կողմերը հայտարարել են, որ Սաակաշվիլու` Վաշինգտոն կատարած այցի ժամանակ հիմնականում քննարկվել են սոցիալ-տնտեսական ոլորտում համագործակցության հարցերը, սակայն որոշ աղբյուրներ հաստատել են, որ քննարկվել են նաև ռազմական համագործակցության հարցեր:
Թերթը գրում է, որ վերջին շրջանում Վրաստանի իշխանություններն անընդհատ փորձում են վերականգնել ԱՄՆ-ի հետ ռազմա-տեխնիկական համագործակցությունը, որը սառեցվել էր 2008 թ. պատերազմից հետո: Թերթը հիշեցնում է նաև, որ Լիսաբոնում կայացած ՆԱՏՕ-ի գագաթնաժողովի ժամանակ Սաակաշվիլին ՆԱՏՕ-ից պահանջել էր անհրաժեշտ ռազմատեխնիկա տրամադրել Վրաստանին ռուսական հնարավոր ագրեսիայից պաշտպանվելու համար` խոստանալով ավելացնել վրացիների թիվն Աֆղանստանում: Այդ միտումներին աջակցելու մասին էր հայտարարել նաև Թբիլիսիում ԱՄՆ դեսպան Ջոն Բասը:
Թերթին նաև հաջողվել է պարզել, որ Սաակաշվիլին ամերիկյան կողմին է տրամադրել ծավալուն զեկույց, որում վրացական կողմը հիմնավորել է այդ երկրին զենքի տրամադրման անհրաժեշտությունը: Խոսքը, ըստ պարբերականի, մի քանի տասնյակ միլիոն դոլար արժողությամբ ծրագրի մասին է:
ԱՄՆ նախագահը, ըստ նույն աղբյուրի, հանձնարարել է համապատասխան կառույցներին գնահատել վրացական կողմի ներկայացրած զեկույցը և այն բավարարելու անհրաժեշտությունը: