Եթե դեռեւս 1 ամիս առաջ «Լոռի» պանրի 1 կգ վաճառվում էր 1800 դրամով, ապա այսօր խանութներ կան, որտեղ նույն պանիրը սպառվում է 2600-3000 դրամով: Թեեւ Տնտեսական մրցակցության պաշտպանության պետական հանձնաժողովը պանրի թանկացումը պատճառաբանել էր կաթի թանկացմամբ, սակայն Սպառողների իրավունքների պաշտպանության ՀԿ-ի նախագահ Աբգար Եղոյանի համար տվյալ պատճառաբանությունը թերի է: «Հանձնաժողովի տարածած հաղորդագրության համաձայն` կազմակերպությունները հոկտեմբերի 1-ից սկսել են կաթը թանկ գնել: Եթե անգամ 1 լիտր կաթի վաճառքը 110-ից դառնար 145 դրամ, ապա թանկացումները շատ ավելի քիչ պետք է լինեին: Այսինքն` եթե կաթը թանկացել է 35 դրամով, ապա 9 անգամ 35 լինում է 315 դրամ: Այնինչ, տեսնում ենք, որ համարժեք թանկացում տեղի չի ունեցել; Մարտ ամսվա համեմատ մենք ունենք 620 դրամի թանկացում, այսինքն` կրկնակի ավել թանկացում: Այն էլ` նվազագույն հաշվարկներով», – պարզաբանեց Աբգար Եղոյանը եւ ավելացրեց, որ այսօր սպառողներից ահազանգ էին ստացել, թե Մաշտոցի պողոտայում 1 կգ պանրի գինն արդեն հասել է 3 հազար դրամի: «Ես կասկածում եմ, որ բոլոր կաթ մթերողները սկսեցին կաթն ավելի թանկ գնել հենց հոկտեմբերի 1-ից: Եվ ամենակարեւորը, կաթի գինը խանութում նույնն է, ավելին` մարտ ամսվա նկատմամբ 10 դրամով իջել է: Հիմա հարց է ծագում. եթե կաթի գինը չի բարձրացել, նույնիսկ 10 դրամով իջել է, ինչո՞ւ է պանրի գինն այսքան թանկացել: Այդ պատճառով ես դա համարում եմ հայկական առեղծված», – ավելացրեց Սպառողների իրավունքների պաշտպանության ՀԿ-ի նախագահը: Ի դեպ, Արագածոտնի մարզի պանրի արտադրությամբ զբաղվող գյուղացիները մեզ հետ զրույցում նշեցին, որ ներկա դրությամբ կաթ չի էլ մթերվում, քանի որ այս ամիսներին կովերի կաթը ցամաքում է, եւ նրանք պատրաստվում են բեղմնավորման: Իսկ նախկինում կաթը իրենցից մթերվել է առավելագույնը 110 դրամով:
