Կալիֆոռնիայի Սքրիփսի համալսարանի տրանսլյացիոն հետազոտությունների և «Վերայդեքս» ընկերության մասնագետները հայտարարել են մի հայտնագործության մասին, որը թույլ կտա զգուշացնել մարդուն` վերջինիս սպառնացող սրտամկանի մոտալուտ ինֆարկտի մասին: Այս մասին գրված է «Տրանսլյացիոն բժշկական հետազոտություններ» ամսագրի վերջին համարում լույս տեսած ուսումնասիրության մեջ:
Կալիֆոռնիայի համալսարանի տնօրենի ղեկավարությամբ աշխատող գիտախումբը պարզել է, որ մինչ ինֆարկտը մարդու արյան մեջ առաջանում են մեծ քանակությամբ դեֆորմացված էնդոթելիումի բջիջներ: Դրանց առաջացումը, մասնագետների կարծիքով, կարելի է դիտարկել որպես ինֆարկտի նախազգուշացում:
Գիտնականներն այդպիսի եզրակացության են եկել` հետազոտելով շուրջ 100 մարդու, որոնք տարել են սրտամկանի ինֆարկտ:
Միևնույն ժամանակ, գիտնականներն առայժմ չգիտեն` հիվանդության ո՞ր փուլում է հնարավոր արյան մեջ հայտնաբերել էնդոթելիումի «հիվանդ բջիջները»` ինֆարկտից մի քանի ժամ, օրեր, թե շաբաթներ առաջ:
Գիտնականները խոստովանում են, որ սա միայն առաջին քայլն է, և առջևում նրանց մեծ աշխատանք է սպասվում:
