Այսօր մամուլի ասուլիսի ժամանակ Վրաստանի արտաքին գործերի նախարարի տեղակալ Նինո Քալանդաձեն հայտարարել է, որ հունվարի 22-ին Վրաստանի նախագահը կլինի Հայաստանում:
Նրա խոսքերով, Վրաստանի նախագահը պատրաստվում է հանդիպել Սերժ Սարգսյանի հետ: Այցի ժամանակ Սաակաշվիլիին ուղեկցելու է արտաքին գործերի նախարար Գրիգոլ Վաշաձեն, որը մինչ այդ այց կկատարի Ադրբեջան:
«Այս այցելությունը Հայաստան շատ կարևոր է, քանի որ առաջին պաշտոնական այցն է այս տարվա ընթացքում և ցույց է տալիս, որ բարիդրացիական հարաբերություններ ունենալու ցանկություն գոյություն ունի»,- ասել է փոխարտգործնախարարը: Նա նաև նշել է, որ բարձր մակարդակի այս հանդիպման ժամանակ քննարկվելու են երկկողմ հարաբերություններին վերաբերող հարցեր:
«Հուսով ենք, որ այցը հաջող կլինի»,- ավելացրել է Ն. Քալանդաձեն:
Հիշեցնենք միայն, որ մամուլում լուրեր էին տարածվում, թե այս այցը կայանալու է մարտ ամսին: Որն է այցի այսքան շուտ կազմակերպման պատճառը՝ կիմանանք, հավանաբար, հենց այցի ժամանակ: Այս մասին հաղորդում է Грузия-Online կայքը:
Լուսանկարը՝ PanArmenianPhoto-ի