Հյուսիսային Կորեան չորեքշաբթի օրը ևս մեկ անգամ քննադատել է Սեուլի գալիք վեհաժողովը` ասելով, որ հանդիպման ժամանակ Հյուսիսային Կորեայի միջուկային ծրագիրը քննարկելու Հարավային Կորեայի փորձերը կդիտվեն որպես պատերազմի հայտարարություն:
AFP-ն հաղորդում է, որ միջուկային անվտանգության մարտի 26-27-ը կայանալիք վեհաժողովը, որին մասնակցելու է ԱՄՆ նախագահ Բարաք Օբաման և այլ երկրների ղեկավարներ, հիմնականում կենտրոնանալու է միջուկային ահաբեկչության խնդիրների քննարկման վրա:
Բայց ակնկալվում է, որ հանդիպման ժամանակ կքննարկվի նաև Հյուսիսային Կորեայի միջուկային ծրագիրը և երկրի վերջերս արած հայտարարությունը՝ ապրիլին արբանյակային հրթիռ արձակելու վերաբերյալ:
ԱՄՆ-ը, Չինաստանը և այլ երկրներ կքննարկեն, թե ինչպես կարելի է համոզել Փխենյանին հրաժարվել հրթիռ արձակելու որոշումից:
Հյուսիսային Կորեան նախկինում ևս դատապարտել էր այս հանդիպումը` այն համարելով «ծիծաղելի մի փորձ», որով Հարավային Կորեան և ԱՄՆ-ը ցանկանում են արդարացնել Հյուսիսային Կորեայի վրա ատոմային հարձակում իրականացնելը:
