Առևտրային պատերազմ սկսելու սկսելու սպառնալիքը Եվրամիությանը չի ստիպի հրաժարվել այսպես կոչված՝ «ածխածնի հարկից», որը հարուցել է ավիաընկերությունների բուռն քննադատությունը Եվրոպայի իշխանությունների հասցեին: Այս մասին The Financial Times-ին տված հարցազրույցում հայտարարել է ԵՄ-ի կլիմայի հարցերով կոմիսար Կոննի Խեդեգաարդը:
«Դուք չեք կարող սպառնալ առևտրային պատերազմով միայն այն բանի համար, որ ձեզ դուր չի գալիս եվրոպական օրենսդրությունը»,- ասել է նա հարցազրույցում:
Վերջինիս խոսքով` սպառնալիքը չի սասանի Եվրամիության հաստատակամությունը:
«Եթե կան եվրոպական օրենքներ, որոնք ձեզ դուր չեն գալիս, ինչո՞ւ եք մեզ սպառնում: Ես կարծում եմ, որ Եվրոպայում գործարարների մեծ մասը հասկանում է, որ մենք այս խաղը չենք կարող խաղալ 21-րդ դարում»,- հավելել է Խեդեգաարդը:
Հարցին ի պատասխան` արդյոք հնարավո՞ր է համաձայնության եզր գտնել ավիաընկերությունների հետ, նա ասել է, որ «չի պատրաստվում ենթադրություններ անել»:
ԵՄ-ն 2012-ի հունվարի 1-ից մտցրել է, այսպես կոչված, «ածխածնի հարկ»` կլիմայական փոփոխությունների պայքարի համատեքստում:
