ՀՀ-ում ապրող ամենամեծ ազգային փորքամասնությունը իր եղբայրն ու բարեկամն է համարում հայերին, իսկ Հայաստանը` նաև սեփական հայրենիք:
Ամբողջ աշխարհում այսօր կա 1.5-2 մլն եզդի, որոնցից շուրջ 50 հազարն ապրում է Հայաստանում: Նրանց երեխաները սովորում են միևնույն հայկական դպրոցներում, իրենք էլ աշխատում են երբեմն միևնույն միջավայրում և հայի հետ հարևանություն անում երբեմն նույնիսկ ավելի մտերիմ, քանի իրենց ազգակցի հետ: Հայաստանում նրանք հիմնականում զբաղվում են անասնապահությամբ ու հողագործությամբ և այս կերպ հաճախ հասնում են նախանձելի հարստության, որը սակայն դրսում գրեթե երբեք չի նկատվում: «Մեզ այստեղ ոչինչ չի խանգարում, մեր երկրի պես ազատ ապրում ենք, հայերի հետ էլ ջերմ շփվում ենք»,- «Առաջին լրատվականի» լրագրողի հետ զրույցում նշեց Արարատ գյուղում բնակվող ազգությամբ եզդի Շաքրո Շամոյանը: Հայաստանում եզդիների կյանքն արտացոլվում է պետական ֆինանսավորմամբ գործող եզդիական թերթերի` Լալըշ-ի և Էզդիխանա-ի էջերում: Ինչպես իրենք եզդիներն են նշում, Հայաստանում նրանք կարողանում են լիարժեք պահպանել ազգային և կրոնական սովորույթները, նշել սիրելի ու թանկ տոները, ցուցադրել բոլոր սրբությունները և որ շատ կարևոր է` լիարժեք դրսևորվել ցանկացած ասպարեզում. ունեն հայտնի ու սիրված բժիշկներ, իրավաբաններ, ուսուցիչներ, երգիչներ, հանրահայտ մարզիկներ և մտավորականներ: Ընդհանուր առմամբ եզդիները գոհ են Հայաստանից, ինչպես իրենք են հաճախ ասում` «Սա մեր հայրենիքն է` թանկ ու նվիրական»: Իսկ այստեղ նրանք ունեն գրեթե միևնույն սոցիալական, կրթական ու մշակութային խնդիրները, ինչ որ հայ քաղաքացին:
