Այսօր ինտերնետը ոչ միայն ծառայում է որպես օպերատիվ ինֆորմացիա ստանալու աղբյուր, այլև հանդիսանում է միջանձնային հարաբերությունների միջնորդ, թույլ տալիս հաղթահարել տարածությունը, ժամանակը, ձեռք բերել մտքի ազատություն, գտնվել աշխարհի նորությունների կիզակետում և այլն: Ինտերնետի միջոցով մարդիկ գիտելիքներ են ստանում, աշխատանք գտնում, ամուսնանում, սակայն այն ոչ բոլորն են կիրառում անհրաժեշտության դեպքում, արդյունքում՝ ընկնում են կախվածության մեջ: Հոգեբան Արփինե Կարապետյանի խոսքով՝ ինտերնետը դրական ազդեցություն ունի, երբ մարդը ինքն է ղեկավարում այն, ինքն է ընտրություն կատարում՝ իմանալով, թե ինչ ինֆորմացիա է ուզում ստանալ, իսկ երբ մարդը ինտերնետային ցանց է մտնում միմիայն հետաքրքրության համար, տեղեկատվությունն է ընտրում նրան, խանգարվում է նրա կյանքի ռիթմը: Իսկ Հայաստանում այսօր ծիծաղելի կլինի ասել, թե մարդն է ղեկավարում ինտերնետը: Alexa.com վիճակագրական ծառայության տվյալների համաձայն` Հայաստանում ներկայումս մասսայական են ոչ հայկական կայքերը, սոցիալական ցանցերից` նույն Odnoklassniki.ru-ն, Vkontakte.ru-ն և ամերիկյան խոշորագույն Facebook.com ցանցը (հիշեցնենք, որ ըստ այդ վիճակագրության` 1in.am-ը 14-րդն է ընդհանուր ցանկում և 3-րդը` զուտ հայկական կայքերի շարքում): Միջին հայ սպառողը մասնագետների կարծիքով` նեղ հորիզոն ունի, օգտվում է սահմանափակ կայքերից, իսկ այցելությունների հիմնական կետերը ծանոթությունների կայքերն են, ընդ որում` ոչ հայկական, լրատվական աղբյուրները ինտերնետի հայկական սեգմենտից դուրս են:
Փորձագետ Անդրանիկ Գևորգյանի խոսքով, հայերի մեծ մասը հայերենով ավելի շատ պոռնոգրաֆիա է փնտրում ու անիմաստ ստատուսներ, քան կարևոր ինֆորմացիա: Օրինակ այս տարվա հունվարի 10-ի դրությամբ եթե google-ում պոռնոգրաֆիա փնտրել է 55,102 մարդ, ապա բառարաններ` ընդամենը 6,022-ը, իսկ նշվածներից բացի` հայերը փնտրում են օդնոկլասսնիկիի ստատուսներ, սիրային բանաստեղծություններ, ծննդյան շնորհավորանքներ, ավտոշուկա, խաղեր, աշխատանք, ռեֆերատ, աստղագուշակ կամ Արմենչիկի երգեր: