ԱԳՆ մամլո գրասենյակից «Առաջին լրատվական»-ին տեղեկացնում են, որ մարտի 20-ին Իտալիայում ՀՀ դեսպան Ռուբեն Կարապետյանը հանդիպում է ունեցավ Իտալիայի տարածաշրջանային գործերի, զբոսաշրջության և սպորտի նախարար Պիեռո Գնուդիի հետ /Piero Gnudi/, որի ընթացքում քննարկել է նշված բնագավառներում հայ-իտալական համագործակցության խորացման հետ կապված հարցեր:
Դեսպանը նախարար Գնուդիին տեղեկացրել է այն մասին, որ վերջին տարիներին երկու երկրների միջև 2009թ. ի վեր օդային ուղիղ կապի հաստատումից հետո զգալիորեն մեծացել են զբոսաշրջության ծավալները:
Այս ընթացքում իտալացի զբոսաշրջիկների թիվը գրեթե եռապատկվել է` 2011թ. կազմելով Հայաստան այցելող ողջ զբոսաշրջիկների շուրջ 18 տոկոսը:
Դեսպանը տեղեկացրել է նաև, որ Իտալիայում ՀՀ դեսպանության հովանավորությամբ վերջին մեկ տարվա ընթացքում կազմակերպվել են զբոսաշրջության ոլորտի հայ-իտալական երկու համաժողովներ Վենետիկում և Կալյարիում, ինչպես նաև «Սուրբ Ղազարից մինչև Հայաստան» նախագծի շրջանակներում ս.թ. մարտի 30-ին Երևանում նախատեսվում է անցկացնել «Հայաստան Զբոսարջության զարգացման հնարավորությունները» գործարար համաժողով:
Կողմերը կարևորել են ընթացիկ տարվա նոյեմբերին Իտալիայի Պեստումի հեղինակավոր 15-րդ միջազգային հնագիտական զբոսաշրջության ցուցահանդեսին Պատվավոր հյուրի կարգավիճակով Հայաստանի մասնակցությունը:
Զրուցակիցները քննարկել են զբոսաշրջության ոլորտում իրավա-պայմանգային դաշտի ձևավորման հնարավորությունները:
Հանդիպման ընթացքում երկուստեք կարևորվել է Հայաստանի և Իտալիայի նահանգների ու քաղաքների միջև ապակենտրոնացված համագործակցության սերտացումը: Գոհունակությամբ արձանագրվեց, որ վերջին երկու տարվա ընթացքում համագործակցության վերաբերյալ փաստաթղթեր են ստորագրվել Իտալիայի և Հայաստանի 6 վարչատարածքային /մարզային և քաղաքային/ միավորների միջև:
Զրուցակիցների կողմից հատուկ ընդգծվել է սպորտի բնագավառում համագործակցության զարգացման համար առկա հնարավորությունները: Այս կապակցությամբ, Ռուբեն Կարապետյանը նախարար Գնուդիին հրավիրել է այցելել Հայաստան` հոկտեմբերի 9-ին ֆուտբոլի աշխարհի առաջնության համար Երևանում կայանալիք Հայաստան-Իտալիա խաղը դիտելու նպատակով:
