Թուրքական Haber Türk թերթի փոխանցմամբ՝ Թուրքիայի պաշտպանության նախարար Իսմեթ Յըլմազը երեկ այցելել է օրեր առաջ Աֆղանստանում ուղղաթիռի կործանման հետևանքով զոհված 12 թուրք զինծառայողներից մեկի տուն:
Լրագրողների հետ զրույցում Յըլմազը հայտարարել է, որ եթե անգամ ՆԱՏՕ-ն դուրս գա Աֆղանստանից, Թուրքիան չի վարվի նման կերպ և կշարունակի պահպանել իր ներկայությունն այդ երկրում.
«Աֆղանստանը ծանր վիճակում է և զգում է Թուրքիայի օգնության կարիքը: Եթե անգամ ՆԱՏՕ-ն դուրս գա Աֆղանստանից, մենք կշարունակենք մնալ այնտեղ: Մենք կմնանք այնքան, որքան որ դա ցանկանա Աֆղանստանը»:
Հիշեցնենք, որ Աֆղանստանում գտնվող թուրք զինծառայողներին արգելված է մասնակցել ՆԱՏՕ-ի ռազմական գործողություններին, ինչում իր ծանրակշիռ դերն է խաղում կրոնական գործոնը (իսլամը): Թուրք զինծառայողներն Աֆղանստանում զբաղված են իրենց աֆղան գործընկերներին և աֆղան ոստիկաններին փորձառություն հաղորդելով և պարեկություն կատարելով:
