Մարտի 1-ի սպանությունների բացահայտմանն ուղղված ցանկացած առաջարկ իմիտացիա է, «Առաջին լրատվական»-ի հետ զրույցում նման տեսակետ հայտնեց 2008 թ. մարտի 1-ին սպանված Գոռ Քլոյանի հայրը՝ Սարգիս Քլոյանը, անդրադառնալով օրեր առաջ ԵԽԽՎ-ի գաղտնազերծած տեղեկատվական փաստաթղթին Հայաստանի հարցով համազեկուցող Ջոն Պրեսկոտի Երևան հունվարի 16-17-ը այցի վերաբերյալ:
Հիշեցնենք, որ համազեկուցողները փոխանցել էին, որ նախագահ Սերժ Սարգսյանը հայտնել է, թե բաց է իրենց առաջարկների քննարկման համար և խնդրել է Դավիթ Հարությունյանին մշակել հայեցակարգ՝ անցկացնելու հանրային լսումներ քրեական հետաքննության արդյունքների վերաբերյալ: Համազեկուցողները նաև տեղեկացրել էին, որ Ս. Սարգսյանը մտահոգություն էր հայտնել, որ այս խնդիրը քաղաքականացվել է և կարող է շահարկվել քաղաքական նպատակներով՝ հատկապես 2012 թ. մայիսի 6-ի խորհրդարանական ընտրությունների համատեքստում:
Սարգիս Քլոյանը ՀՀ նախագահի հանրային լսումներ անցկացնելու առաջարկը լոկ շոու որակեց` ուղղված Եվրոպային: «ՀՀ դատախազը մեղադրել էր մարտիմեկյան զոհերի հարազատներին, որ նրանք հռետորներ են դարձել և քաղաքականացրել սպանությունները: Իսկ մեզ ի՞նչ էր մնում անել: Մենք դիմել ենք ՀՀ երեք դատարաններին, այնուհետև դիմել ենք ՄԻ Եվրոպական դատարանին, իրավապաշտպան տարբեր կազմակերպությունների, Մարդու իրավունքների հանձնակատարին և այլն: Մեզ մնում էր ՀՀ քաղաքացիներին ներկայացնել, թե մենք ինչ ենք արել այս չորս տարվա ընթացքում, որը չեն արել իշխանությունները: Մենք պետք է մեր հայրենակիցներին ասեինք, որ ՀՀ դատախազությունը և ՀՔԾ-ն չեն գործում, որովհետև Հայաստանում չկա արդարադատություն»,- մեկնաբանեց Ս. Քլոյանը` հավելելով, որ այդ բոլոր առաջարկները Սերժ Սարգսյանի կողմից խոսքեր են, թե երբ իրականություն կդառնան, հայտնի չէ: Նրա համոզմամբ` ոչ մի հանրային լսում կազմակերպելու կարիք չկա: Սարգիս Քլոյանի խոսքով` ինչ էլ որ լինի, լինելու է իմիտացիա. «Մենք մեր երեխաների սպանությունների բացահայտման համար սպասում ենք իշխանափոխության»: