«Ժողովրդավարություն և Աշխատանք» կուսակցությունը խորհրդարանի առաջիկա ընտրություններում սատարելու է Հանրապետական կուսակցությանը: Այսօր կառավարության նիստերի դահլիճում կայացած համաժողովի ընթացքում հայտարարել է ԺԱԿ կուսակցության նախագահ, ԱԺ պատգամավոր Սպարտակ Մելիքյանը` նշելով, որ դա է ցույց տվել վերջին հինգ տարիների փորձը. «ԺԱԿ-ը վստահում է ՀՀԿ-ին և Հայաստանի նախագահ Սերժ Սարգսյանի խոստումներին, միաժամանակ պատրաստ է կիսելու այդ խոստումներն իրագործելու պատասխանատվությունը»:
Հանրային խորհրդի անդամ Վազգեն Սաֆարյանը, ով ներկա է եղել համաժողովին, հավաստիացրել է, որ ԺԱԿ-ն իր ուրույն տեղն ունի քաղաքական ներկապնակում. «Ինչպես նախորդ ընտրություններում, այնպես էլ այս անգամ «Ժողովրդավարություն և Աշխատանք» կուսակցությունը ՀՀԿ-ի հետ միասին տեղ կունենա խորհրդարանում և կպայքարի սոցիալ–տնտեսական հավասարակշռության, քաղաքացիական հասարակության ձևավորման համար»:
Սպարտակ Մելիքյանի խոսքերով՝ իրենց գլխավոր նպատակն ու խնդիրն է լինելու պատրաստվել խորհրդարանական ընտրություններին. «ԺԱԿ-ը կայացել է որպես կենսունակ, գաղափարակիր անդամներով համալրված կառույց, որի համար առաջնային է եղել քաղաքական սկզբունքայնությունը և հայրենանվեր աշխատանքը, և ոչ երբեք քաղաքական էժան պոպուլիզմը»:
Հավելենք, որ Սպարտակ Մելիքյանը ՀՀ Ազգային ժողովի պատգամավոր է: Նա խորհրդարան է անցել հենց ՀՀԿ համամասնական ցուցակով: