ԱՄՆ-ի` Պակիստանում և Աֆղանստանում հատուկ ներկայացուցիչ Ռիչարդ Հոլբրուքի հրաժեշտի արարողությունը, որը մահացել է դեկտեմբերին աորտայի պատռվածքից, տեղի կունենա ուրբաթ օրը Վաշինգտոնում: Այս մասին հաղորդում է Fox News-ը:
Հոլբրուքը մահացել է դեկտեմբերի 13-ին Ջորջ Վաշինգտոնի անվան քաղաքային համալսարանի հիվանդանոցում: Դրանից 3 օր առաջ 69-ամյա դիվանագետը վատ էր զգացել իրեն և տեղափոխվել հիվանդանոց պոկված արենախիցքի կասկածով:
Ինչպես հայտնում են պետդեպարտամենտի և Սպիտակ տան մամլո ծառայությունից, հրաժեշտի արարողությունը, որի սկիզբը նախատեսված է օրվա երկրորդ կեսին, տեղի կունենա մայրաքաղաքի Քենեդու անվան կենտրոնում։ Ինչպես ակնկալվում է, այդ արարողությանը կմասնակցեն նաև ԱՄՆ նախագահն ու փոխնախագահը: Սպիտակ տան մամլո ծառայությունը հայտնում է, որ Բարաք Օբաման պլանավորում է հանդես գալ Հոլբրուքի հիշատակին նվիրված խոսքով:
Պետդեպարտամենտի պաշտոնական ներկայացուցիչ Ֆիլիպ Քրոուլին հինգշաբթի օրը լրագրողներին հայտնել է, որ այդ արարողությանը ներկա կգտնվի նաև պետքարտուղար Հիլարի Քլինթոնը:
«Անշուշտ, Քլինթոնը կմիանա նախագահին և կմասնակցի հիշատակի արարողությանը»,- ասել է Քրոուլին պետդեպարտամենտում տեղի ունեցած բրիֆինգի ժամանակ:
Ինչպես սպասվում է, հրաժեշտի արարողությանը կմասնակցեն նաև մի շարք արտասահմանյան երկրների ներկայացուցիչներ և ղեկավարներ: