Հարավային Կովկասում ստեղծված իրավիճակը կարող է լոկալ կոնֆլիկտների հանգեցնել

Տեղական փոքր կոնֆլիկտների առաջացման դեպքում գործընթացին կարող են միջամտել օտար ուժեր, այդ թվում՝ ՆԱՏՕ-ի անդամ պետություններ: Այս կարծիքն է հայտնել Ռուսաստանի ռազմական կանխատեսումների անկախ կենտրոնի ղեկավար Անատոլի Ցիգանյուկը: Նրա կարծիքով, բանակցային գործընթացներում փակուղային իրավիճակ է, իսկ կողմերի դիրքորոշումներն անփոփոխ են: Ցիգանյուկը համարում է, որ համաձայնություն չկա նաև միջնորդների դիրքորոշումներում: ԱՄՆ-ը, Ռուսաստանն ու Եվրոպան համակարծիք են միայն հակամարտությունը խաղաղ միջոցներով հանգուցալուծելու` Լեռնային Ղարաբաղի բնակչությանն անվտանգություն, կարգավիճակ և Հայաստանի հետ ցամաքային սահման ապահովելու հարցերում: Սակայն առկա են նաև հակասություններ: Մասնավորապես, փորձագետը կարծում է, որ Ռուսաստանը ներկայիս ստատուս քվոյի փոփոխությանը համաձայնություն կտա միայն այն դեպքում, եթե հայկական զորքերը դուրս բերվեն ադրբեջանական տարածքներից և տեղակայվելիք խաղաղարար առաքելության հիմնական ուժերը հենց ռուսական լինեն: Իսկ Բրյուսելն ու Վաշինգտոնը ցանկանում են առաքելության հիմնական ուժ տեսնել տարածաշրջանում ուղիղ աշխարհաքաղաքական շահեր չունեցող պետությունների զինված ուժերը: Այս առումով, Հարավային Կովկասի սառեցված հակամարտությունները որոշակիորեն սպառնալիք են Ռուսաստանի ազգային անվտանգությանը: