Առաջին հայացքից կարող է թվալ, որ Երևանի ներկայիս քաղաքապետ Կարեն Կարապետյանը կապ չունի քրեական աշխարհի հետ: Բայց դա միայն առաջին հայացքից: Իրականում Կարեն Կարապետյանը նախորդ քաղաքապետից ոչ պակաս քրեական շրջապատ ունի, որոնց ոչ միայն ջանալու է բերել իշխանական համակարգ, այլև շատերին փորձելու է դուրս բերել կալանավայրերից:
Իսկ կալանավայրերից դուրս բերվողների ցուցակում առաջնահերթներից է 1973 թ. ծնված Հայկ Իսրայելյանը` Մոնումենտցի Հայկոն, որը, ըստ որոշ աղբյուրների, քրեական աշխարհում հայտնի է որպես քիլլեր: Հիշեցնենք, որ նա հայտնի է «Ռելաքս» դիսկո-ակումբում Մհեր Պողոսյանի` Մըգստի սպանությամբ: Այժմ Հայկին կալանավայրում հովանավորում և պահանջմունքները բավարարում է մոնումենտցի նորանշանակ քաղաքապետ Կարեն Կարապետյանը: Իսկ նրանց կապում է ոչ միայն մոնումենտյան մանկություն-ընկերությունը, այլև այն, որ Հայկ Իսրայելյանը Կարեն Կարապետյանի եղբոր երեխաների քավորն է: Իսկ Կյաժ Էդոն՝ Էդուարդ Մուշեղյանը, որը վերջերս նշանակվեց Արաբկիրի թաղապետ, Հայկի երեխաների քավորն է: Հետևաբար, Կարեն Կարապետյանը, օգտվելով իր զբաղեցրած դիրքից, ամեն ինչ անելու է Հայկին կալանավայրից դուրս բերելու համար: Հիշեցնենք, որ իշխանական աղբյուրների հաղորդմամբ, նա համաձայնել էր ստանձնել քաղաքապետի պաշտոնը Սերժ Սարգսյանի կողմից մի շարք հարցերի շուրջ համաձայնության գալու արդյունքում, որոնց թվում չի բացառվում, որ եղած լինի հենց այս մեկը։