Անդրադառնալով արտասահմանցիների ԼՂ այցելություններից հետո ամեն առիթով Ադրբեջանի իշխանությունների բարձրացրած աղմուկին` այսօր հրավիրած մամլո ասուլիսում ՀՀ ԱԳ նախարար Էդվարդ Նալբանդյանը նախ ողջունեց բոլոր նրանց, ովքեր այցելում են Արցախ, ապա հավելեց. «Չնայած Ադրբեջանի անհասկանալի մոտեցմանը և քաղաքականությանը, թե՛ լրագրողներ, թե՛ քաղաքական, թե՛ մշակութային գործիչներ այցելում են ԼՂՀ, որ իրենց աչքով տեսնեն՝ իրականությունն ինչ է ԼՂՀ-ում: Չնայած այդ մոտեցումը գուցե անհասկանալի էլ չէ Ադրբեջանի կողմից: Հասկանալի է այնքանով, որ թաքցնում են, փորձում են թաքցնել իրենց սուտը, իրենց կեղծիքներըը, իրենց հանցագործությունները, որ կատարվել են ԼՂՀ-ում: Ինչո՞ւ չեն թողնում՝ Նախիջևան գնան, Նախիջևանն էլ հո իրենց վերահսկողության տակ է: Գուցե՝ որ չտեսնե՞ն հայկական ջախջախված, քանդված խաչքարերը, ոչնչացված մշակութային ժառանգությունը, հայկական մշակութային ժառանգության այն շատ մեծ, կարևոր ներկայությունը, որ գոյություն ունի Նախիջևանում: Գուցե որ այցելեն՝ հարց տան` ո՞ւր է այս ժողովուրդը, և ի՞նչ պատճառով այստեղ չէ»:
/Լուսանկարը` PanarmenianPhoto-ի/
