«Վարդան Օսկանյանի այստեղ լինելը չի ազատում նրան Մարտի 1-ի համար պատասխանատվությունից»,- այսօր «Ազատ դեմոկրատներ» կուսակցության արտահերթ 2-րդ համագումարից հետո լրագրողների հետ կայացած ճեպազրույցում ասաց «Ազատ դեմոկրատներ»-ի վարչության անդամ Արարատ Զուրաբյանը` պատասխանելով հարցին, թե ինչու են հրավիրել միայն վերջերս ԲՀԿ-ին անդամագրված Վարդան Օսկանյանին և ոչ մյուս կոալիցիոն քաղաքական կուսակցությունների ներկայացուցիչներին:
Կուսակցության նախագահ Խաչատուր Քոքոբելյանն ասաց, որ նպատակահարմար են համարել հրավիրել այն քաղաքական ուժերին, որոնք, իրենց պատկերացմամբ, չեն խոչընդոտում ՀՀ-ի այսօրվա ժողովրդավարացման ընթացքին: «Իմ կողքին կանգնած է նախկին արտգործնախարար Ալեքսանդր Արզումանյանը և հպարտ եմ դրա համար»,- հավելեց նա:
«Ազատ դեմոկրատներ» կուսակցության անդամ Ալեքսանդր Արզումանյանն էլ նշեց, որ Վ. Օսկանյանը համագումարին հրավիրված է եղել որպես անհատ, այլ ոչ` ԲՀԿ անդամ: ՀԱԿ առաջնորդ Լևոն Տեր-Պետրոսյանին հրավիրելը կուսակցությունում ձևական են համարում, իսկ ՀՀՇ-ից ում որ պետք է հրավիրեին՝ իրենց հետ է:
Երկու կուսակցությունների երկար սպասված դաշինքի մասին Ա. Զուրաբյանն ասաց, որ ձգձգումը միայն տեխնիկական խնդիրների հետ է կապված: «Ոչինչ չեմ ուզում բացառել, բայց ասեմ, որ 99 տոկոսով խնդիրը լուծված է, եթե ինչ-որ նոր ատոմային պատերազմ չլինի, հավատացած եղեք, որ այս գործընթացն իր տրամաբանական հանգրվանին կհասնի»,- վստահեցրեց նա:
Մամուլում տարածված լուրերի առնչությամբ, թե երկու կուսակցությունների համամասնական ցուցակներում տեղերի բաշխման տոկոսների հետ կապված որոշակի խնդիրներ կան, Խաչատուր Քոքոբելյանն վստահեցրեց` և՛ «Ազատ դեմոկրատներ»-ում, և՛ «Ժառանգություն»-ում հավաքված են մարդիկ, որոնք վեր են կուսակցական վերադասավորումներից: Մասնավորապես՝ ցուցակի առաջին 6 տեղերի «մասով» էլ հավաստեց, որ անհամաձայնություն չի եղել, որովհետև իրենք անձերի խնդիր չեն քննարկել: Նաև հայտնեց, որ «Ազատ դեմոկրատներ»-ում ճիշտ են համարում, որ ցուցակը գլխավորի «Ժառանգության» առաջնորդ Րաֆֆի Հովհաննիսյանը:
