Ամերիկյան Freedom House ոչ կառավարական կազմակերպությունը, որը, սակայն, բավական ազդեցիկ է կառավարական շրջանակներում, աշխարհում ճանաչված պետություններում և չճանաչված միավորումներում ազատության մասին իր հերթական տարեկան զեկույցում Լեռնային Ղարաբաղը դասել է «ոչ ազատ» երկրների շարքը` Ղարաբաղի գնահատականն այս անգամ իջեցնելով և հավասարեցնելով Ադրբեջանի մակարդակին: Իսկ պատճառաբանությունն այն է, որ ԼՂ-ում անցկացված խորհրդարանական ընտրություններին ընդդիմությունը չի մասնակցել։ Մեկնաբանելով այս հանգամանքը` ԼՂ նախկին ԱԳ նախարար Արման Մելիքյանն ասաց. «Եթե դա է հիմնավորումը, ապա տարօրինակ է։ Ո՞ր կազմակերպություններն ու կուսակցություններն են Ղարաբաղում համարվում ընդդիմադիր. եթե կա այդպիսի բնությագրում, այդ հարցը կարելիէ դիտարկել, եթե չկա՝ ուրեմն սա օդում ասված մի բան է։ Իրականում ԼՂ խորհրդարանը բաղկացած է երեք խմբակցությունից։ Թե դրանցից որ մեկին կարելի է համարել ընդդիմադիր, և որին՝ ոչ ընդդիմադիր, կամ ինչո՞ւ են համարում բոլորին իշխանամետ, սա խնդիր է, որովհետև բոլոր այդ կուսակցությունները ժամանակին համախմբվել էին նորընտիր նախագահ Բակո Սահակյանի շուրջ` Ղարաբաղյան խնդրի լուծման շուրջ վարվող քաղաքականության շրջանակներում։ Մնացյալ հարցերում նրանք կարող էին տարաձայնություններ ունենալ, և այդ տեսանկյունից շատ դժվար է զանազանել, թե նրանցից որն է ընդդիմություն, որը իշխանամետ։ Նրանցից յուրաքանչյուրը ամեն դեպքում սեփական շահերն է հետապնդում երկրի ներքին կյանքում։ Եթե կան ընդդիմադիր գործիչներ, որոնք անիմաստ են համարել մասնակցել ընտրություններին, դա էլ է խնդիր, բայց, միևնույն է, նման որակման հիմք չի տալիս»։ Իսկ հարցին, թե, ամեն դեպքում, այդ որակումը ի՞նչ հետևանքների կարող է հանգեցնել, Ա. Մելիքյանը պատասխանեց. «Իրականում՝ ո՛չ մի, որովհետև տվյալ կազմակերպությունը, ամեն դեպքում, որոշակի շահեր է հետապնդում և փորձում է ձևավորել հանրային կարծիք ինչ-ինչ շահերից ելնելով»։