Reuters գործակալության հաղորդմամբ, Ամերիկայի և Իսրայելի հետախուզական ծառայությունների ձեռք բերած տեղեկությունների արդյունքում լրջորեն նվազել են ԱՄՆ-ի ու Իսրայելի կառավարությունների վրա գործադրվող ճնշումները Իրանի դեմ հարձակվելու առնչությամբ: Գործակալության մատուցմամբ, հենց այդ ձեռքբերումն է պատճառ դարձել, որ ԱՄՆ նախագահ Բարաք Օբաման գերադասի բանակցությունների ճանապարհով Իրանի հետ ընդհանուր եզրահանգումների գալ: Նաև նույն պատճառով է, որ Օբաման ամենուրեք հայտարարում է, թե Իրանի դեմ սահմանված տնտեսական շրջափակումները դրական արդյունք կարող են ունենալ:
Reuters-ը շարունակության մեջ ավելացնում է. «Իսրայելական կողմի տվյալները ապացուցում են, որ Իրանի միջուկային փորձագետների ահաբեկչության և միջուկային կենտրոններ ներթափանցած Stuxnet համակարգչային վիրուսի հետևանքով, լրջորեն վնասվել ու դանդաղել են Իրանի միջուկային աշխատանքները»։
Գործակալության համաձայն, CIA-ի նախկին ղեկավար Մայքլ Հայդենը հայտարարել է. «Ամենայն հավանականությամբ, Իրանի միջուկային կենտրոնների վրա ԱՄՆ-ի հավանական հարձակումը մինչև հաջորդ նախագահական ընտրություններ (2012) հետաձգվել է, ուրեմն, մենք ենթադրածից շատ ավելի երկար ժամանակ ունենք աշխատելու համար»։
